নিয়মীয়া বাৰ্তা ডিজিটেল, ১০ ডিচেম্বৰঃ শ্রীলংকাৰ বিপক্ষে ২–০ত টেষ্ট শৃংখলা দখল কৰাৰ পিছত দক্ষিণ আফ্রিকাই বিশ্ব টেষ্ট চেম্পিয়নশ্বিপৰ পইণ্ট তালিকাৰ শীর্ষস্থানলৈ উন্নীত হৈছে৷ তালিকাত অষ্ট্রেলিয়া দ্বিতীয় আৰু ভাৰত তৃতীয় স্থানত আছে৷ এতিয়া এই তিনিটা দলৰ মাজত ফাইনেলত প্রৱেশৰ দৌৰ তীব্রতৰ হৈ পৰিছে৷ এইক্ষেত্রত দক্ষিণ আফ্রিকাৰ সম্ভাৱনা অধিক হৈ পৰিছে৷ বর্তমান দক্ষিণ আফ্রিকা ৬৩.৩৩ শতাংশ পইণ্টেৰে পইণ্ট তালিকাৰ শীর্ষস্থানত থকাৰ বিপৰীতে দ্বিতীয় স্থানত থকা অষ্ট্রেলিয়াৰ পইণ্ট ৬০.৭১ আৰু তৃতীয় স্থানত থকা ভাৰতৰ শতাংশ পইণ্ট ৫৭.২৯৷ দক্ষিণ আফ্রিকাই এতিয়া মাত্র পাকিস্তানৰ বিৰুদ্ধে ২খন টেষ্ট খেলিবলৈ আছে৷ ভাৰতে আটাইকেইখন মেচত জয়লাভ কৰিলে অষ্ট্রেলিয়াই শ্রীলংকাৰ বিপক্ষে শৃংখলাত জয়ী হ’লেও ফাইনেলত প্রৱেশ কৰিব নোৱাৰে৷ আনহাতে, ভাৰতে চলিত শৃংখলা ৩–১ৰব্যৱধানত জয়লাভ কৰিলে ৬০.৫২ পহণ্ট লাভ কৰিব৷ চলিত শৃংখলা ড্র ৰূপে সামৰণি পৰিলে ফাইনেলৰ দৌৰৰ পৰা বাহিৰ হ’ব ভাৰত৷ পাকিস্তানৰ বিৰুদ্ধে এই শৃংখলাত জয়ী হ’লে বা ড্র হ’লেও দক্ষিণ আফ্রিকাৰ ফাইনেলত স্থান নিশ্চিত হ’ব৷ আনহাতে, পৰাস্ত হ’লেও দলটোৰ ফাইনেলৰ সম্ভাৱনা থাকিব৷ এইক্ষেত্রত দলটোৱে অৱশ্যে ভাৰত আৰু অষ্ট্রেলিয়াৰ ওপৰত নির্ভৰশীল হ’ব৷ আনহাতে, ভাৰতে যদি অষ্ট্রেলিয়াৰ বিৰুদ্ধে বাকী থকা তিনিখন টেষ্টত জয়লাভ কৰে, তেতিয়া ৬৪.০৫ পইণ্ট লাভেৰে অষ্ট্রেলিয়াক অতিক্রমি ভাৰতে ফাইনেলত প্রৱেশৰ পথ মুকলি কৰিব৷ ফাইনেলত স্থান নিশ্চিত কৰিবলৈ হ’লে ভাৰতে অন্তিম তিনিখন টেষ্টত দুখনত জয় আৰু এখনত ড্র ৰাখিব লাগিব৷ এখন মেচত পৰাস্ত হ’লেও ভাৰতৰ ফাইনেলৰ আশা ভংগ হ’ব পাৰে৷ অৱশ্যে ৩–২ ব্যৱধানত শৃংখলা জয় কৰিব পাৰিলেও ভাৰতৰ বাবে কিঞ্চিত আশা থাকিব৷ এইক্ষেত্রত অষ্ট্রেলিয়া আৰু শ্রীলংকাৰ শৃংখলাই ভাগ্য নির্ণয় কৰিব ভাৰতৰ৷