🔹 আয়াৰলেণ্ডৰে তিনিখনীয়া এদিনীয়া মেচৰ শৃংখলা
বিশেষ বাৰ্তা, ৭ জানুৱাৰী : ভ্রমণকাৰী দল আয়াৰলেণ্ডৰ বিৰুদ্ধে খেলিবলগীয়া আইডিএফচি ফাষ্ট বেংক তিনিখনীয়া এদিনীয়া মেচৰ শৃংখলাৰ বাবে অসমৰ উইকেটকীপাৰ–বেটাৰ উমা চেত্রীয়ে ভাৰতীয় দলত স্থান লাভ কৰিবলৈ সক্ষম হৈছে৷ ১০, ১২ আৰু ১৫ জানুৱাৰীত ৰাজকোটৰ নিৰঞ্জন শ্বাহ ষ্টেডিয়ামত মেচকেইখন অনুষ্ঠিত হ’ব৷ অভিনন্দন জ্ঞাপন কৰি এচিএৰ সভাপতি তৰংগ গগৈয়ে কয় যে ভাৰতীয় দললৈ পুনৰ উমাৰ নির্বাচন অসম ক্রিকেটৰ বাবে এক গৌৰৱৰ মুহূর্ত৷ ভাৰতীয় দলক প্রতিনিধিত্ব কৰাৰ বাবে আমি তেওঁক শুভকামনা জনাইছোঁ৷ আনহাতে, এচিএৰ সম্পাদক ত্রিদিব কোঁৱৰেও কয় যে উমাৰ এই কৃতিত্বৰ বাবে আমি অতিশয় গৌৰৱান্বিত৷ কঠোৰ পৰিশ্রম আৰু নিষ্ঠাই তেওঁক ইমান দূৰলৈ আগুৱাই লৈ গৈছে আৰু আমি আশা কৰোঁ- তেওঁ ভৱিষ্যতেও এই ধাৰা অব্যাহত ৰাখিব আৰু অধিক উচ্চতাত উপনীত হ’ব৷ অসম ক্রিকেট সন্থাৰ মুখ্য কার্যবাহী বিষয়া প্রীতম মহন্তই জাৰি কৰা এক বিজ্ঞপ্তিত এই কথা প্রকাশ৷