🔹 দলৰ গোপন তথ্য ফাদিল
বিশেষ বাৰ্তা, ২৫ আগষ্ট : দলৰ গোপন তথ্য ফাদিল কৰা বাবে টীম ইণ্ডিয়াৰ তাৰকা ক্রিকেটাৰ বিৰাট কোহলিক সকীয়নি দিলে ভাৰতীয় ক্রিকেট নিয়ন্ত্রণ ব’র্ডে৷ সম্প্রতি বেংগালুৰুৰ ৰাষ্ট্রীয় ক্রিকেট একাডেমীত এছিয়া কাপৰ বাবে প্রস্তুতি চলাই আছে ভাৰতীয় ক্রিকেট দলে৷ প্রস্তুতি শিবিৰত খেলুৱৈসকল নানা ধৰণৰ পৰীক্ষাত অৱতীর্ণ হৈছে৷ দলটোৰ তাৰকা খেলুৱৈ কোহলিয়ে য়’–য়’ টেষ্টত উত্তীর্ণ হোৱাৰ লগতে তেওঁ কিমান পইণ্ট পালে, সেই কথা ছ’চিয়েল মিডিয়াত সদৰী কৰাৰ ফলত অসন্তুষ্ট হৈ পৰিছে বিচিচিআই৷ ক্রিকেটাৰসকলৰ এনে তথ্য ফাদিল কৰাত নিষেধাজ্ঞা আৰোপ কৰিছে ব’র্ডে৷ কোহলিয়ে ইনষ্টাগ্রামত নিজৰ এখন ছবি পোষ্ট কৰি লিখিছে যে য়’–য়’ত তেওঁ উত্তীর্ণ হৈছে আৰু ১৭.২ পইণ্ট লাভ কৰিছে৷ কোহলিৰ এনে কার্যত অসন্তুষ্ট হৈ ব’ৰ্ডৰ এগৰাকী বিষয়াই কয় যে ক্রিকেটাৰসকলক ছ’চিয়েল মিডিয়াত কোনোধৰণৰ গোপন তথ্য প্রকাশ কৰাৰ পৰা বিৰত থাকিবলৈ কোৱা হৈছে৷ এনে নির্দেশনা মৌখিকভাৱে দিয়া হৈছে৷ যিকোনো খেলুৱৈয়ে অনুশীলনৰ ছবি পোষ্ট কৰিব পাৰে, কিন্তু তেওঁলোকে কিমান পইণ্ট পালে, সেইটো ৰাজহুৱা কৰাৰ অধিকাৰ তেওঁলোকৰ নাই ৷ উল্লেখ্য যে বৃহস্পতিবাৰৰ পৰা টীম ইণ্ডিয়াই এছিয়া কাপৰ বাবে প্রস্তুতি আৰম্ভ কৰিছে৷