নিয়মীয়া বাৰ্তা ডিজিটেল, ১৮ আগষ্টঃ সদ্যসমাপ্ত পেৰিছ অলিম্পিকত যুটীয়া ৰূপৰ পদকৰ বাবে কৰা আবেদন খাৰিজ হোৱাৰ দুদিন পাছত ভাৰতীয় মল্লযোদ্ধা ভিনেশ ফ’গাটে ছ’চিয়েল মিডিয়াত এক দীঘলীয়া পোষ্ট কৰে ৷ এই পোষ্টত তেওঁৰ পূর্বৰ অৱসৰৰ ঘোষণাৰ ক্ষেত্রত এক ইউ–টার্নৰ ইংগিত প্রদান কৰে৷ উল্লেখ্য যে ভাৰতলৈ উভতি অহাৰ এদিন পূর্বে ফ’গাটে ছ’চিয়েল মিডিয়াত এটা দীঘলীয়া আৱেগিক পোষ্ট লিখিছিল৷ পোষ্টটোত তেওঁ লিখে– ‘সম্ভৱতঃ পৰিৱর্তিত পৰিস্থিতিত মই নিজকে ২০৩২ চনলৈকে খেলি থকাটো দেখিবলৈ সক্ষম হ’ম৷’ উল্লেখ্য যে সদ্যসমাপ্ত পেৰিছ অলিম্পিক আছিল ভিনেশ ফ’গাটৰ তৃতীয় গ্রীষ্মকালীন অলিম্পিক৷ এইবাৰ অলিম্পিকত স্বর্ণ পদকৰ যুঁজৰ দিনা পুৱা অতিৰিক্ত ওজনৰ বাবে ভিনেশক ৫০ কিলোগ্রাম মহিলাৰ ফ্রী–ষ্টাইল কুস্তিৰ ফাইনেলত অযোগ্য ঘোষণা কৰা হয়৷ ইয়াৰ পিছতে তেওঁ মল্লযুদ্ধৰ পৰা অৱসৰৰ কথা ঘোষণা কৰে আৰু চিএএছৰ ওচৰত যুটীয়া ৰূপৰ পদক বিচাৰি আবেদন কৰে৷ কিন্তু তেওঁ চিএএছৰ পৰা কোনো সুফল লাভ নকৰিলে৷ কিয়নো এড–ইক বিভাগে ভিনেশ ফ’গাটৰ আবেদন নাকচ কৰে৷ ইফালে নিশ্চিত পদকৰ পৰা বঞ্চিত হৈ হৃদয় ভাঙি চূৰমাৰ হোৱাৰ বিষয়ে উল্লেখ কৰি ভিনেশ ফ’গাটে কয়– ক’বলৈ বহুত আছে, কিন্তু প্রকাশৰ বাবে পর্যাপ্ত শব্দ নাই ৷ মই মাত্র এয়াই ক’ব বিচাৰোঁ যে আমি হাৰ মনা নাছিলোঁ, আমাৰ প্রচেষ্টা বন্ধ হোৱা নাছিল আৰু আমি আত্মসমর্পণ কৰা নাছিলোঁ৷ কিন্তু ঘড়ীটোহে স্তব্ধ হৈ গৈছিল আৰু সময়খিনি উপযুক্ত নাছিল৷ মোৰ ভাগ্য তেনেকুৱাই আছিল৷’ ভিনেশে লিখিছে৷ ‘হয়তো ভিন্ন পৰিস্থিতিত মই নিজকে ২০৩২ চনলৈকে খেলি থকাটো প্রত্যক্ষ কৰিব পাৰোঁ৷ কিয়নো মোৰ মাজত অন্তর্নিহিত যুঁজাৰু শক্তি আৰু মল্লযুদ্ধ সদায় থাকিব৷ মই এইটো ভৱিষ্যদ্বাণী কৰিব নোৱাৰোঁ যে ভৱিষ্যতে মোৰ বাবে অপেক্ষা কৰি আছে ৷ কিন্তু মই নিশ্চিত যে মই যি বিশ্বাস কৰোঁ তাৰ বাবে আৰু সঠিক বস্তুৰ বাবে মই সদায় যুঁজ অব্যাহত ৰাখিম৷’– তেওঁ প্রকাশ কৰে৷