আমেৰিকাৰ বিখ্যাত চিকিৎসক ৰণিত মিশ্বৰীয়ে লিখিছে– অতি অস্বাভাৱিক আৰু জটিল ৰোগবোৰৰ বাহিৰে সাধাৰণ ৰোগবোৰ পৰীক্ষা কৰিবলৈ মই প্রতিজন ৰোগীক গড হিচাপে পোন্ধৰ মিনিটতকৈ বেছি সময় দিব নোৱাৰোঁ৷ কেৱল ময়েই নহয়, আন কোনো ডাক্তৰেও দিব নোৱাৰে৷ ইমান কম সময়ৰ ভিতৰতে ৰোগীজনে ডাক্তৰৰ পৰা তেওঁৰ সমস্যাটো সম্পর্কে আটাইবোৰ কথা জানিব খুজিলে তেওঁ হোমৱর্ক কৰি সম্পূর্ণ প্রস্তুত হৈ আহিব লাগিব৷ এনেকৈ প্রস্তুত হৈ আহিলেহে ডাক্তৰ আৰু ৰোগী উভয়েই নিজৰ নিজৰ কাম ভালকৈ কৰিব পাৰিব৷ সেই কাৰণে ডাক্তৰৰ ওচৰলৈ যোৱাৰ আগতে তলৰ কথাখিনি ভালদৰে অনুসৰণ কৰিবলৈ চেষ্টা কৰিব–
১৷ আপোনাৰ সম্পূর্ণ মেডিকেল ইতিহাস৷
২৷ কিছুদিনৰ আগতে কৰা স্বাস্থ্য পৰীক্ষাৰ সকলো ৰিপ’ট আৰু দৈনন্দিন খোৱা ঔষধৰ নামবোৰ লগত লৈ আনিব৷
৩৷ ঔষধ বুলি কওঁতে কেৱল ডাক্তৰে ব্যৱস্থা পত্রত লিখি দিয়া ঔষধৰ লগতে স্ব–চিকিৎসাত গ্রহণ কৰা কবিৰাজী ঔষধো ধৰিব লাগিব৷
৪৷ কেৱল মেডিকেল ইতিহাসেই যথেষ্ট নহয়৷ পৰিয়ালৰ লোকৰ ৰোগৰ বিৱৰণ আৰু আগতে হোৱা বা বর্তমান হৈ থকা মেডিকেল সমস্যাৰ বিষয়েও ডাক্তৰক জনাবলৈ নাপাহৰিব৷
৫৷ আপোনাৰ যদি বহুমূত্র ৰোগ আছে, তেন্তে ডাক্তৰৰ ওচৰলৈ অহাৰ আগতে তেজত চেনিৰ পৰিমাণ লিখি ৰাখিব আৰু লগত লৈ আনিব৷
৬৷ একেবাৰে শেষত আনিব উচ্চ ৰক্তচাপৰ কথা৷ ডাক্তৰৰ ওচৰলৈ অহাৰ এসপ্তাহ আগৰে পৰাই আপুনি প্রতিদিনে ৰক্তচাপ জুখিব৷ ডাক্তৰৰ ওচৰলৈ আহিহে বেছিভাগ মানুহৰ ৰক্তচাপ আপোনাআপুনি বাঢ়ি যায়৷ গতিকে, আপোনাৰ আগৰ সপ্তাহটোৰ প্রতিদিনৰ ৰক্তচাপ জানিলেহে আপোনাৰ ৰক্তচাপৰ বিষয়ে সঠিক ধাৰণা কৰাটো ডাক্তৰৰ পক্ষে সম্ভৱ হ’ব৷