সাক্ষাৎগ্রহণঃ কুমুদ তালুকদাৰ
ফোনঃ ৮৬৩৮৪–১৪৯৫৪
সোঁতৰ বিপৰীতে যোৱা এগৰাকী ব্যতিক্রমী মহিলা গুৱাহাটীৰ ধৃতিমালা ডেকা৷ মহানগৰীৰ চেনীকুঠিত জন্মগ্রহণ কৰা ধৃতিমালা ডেকা সম্প্রতি শ্মশান বন্ধু হিচাপে সমগ্র অসমতে পৰিচিত হৈ পৰিছে৷ আত্মীয়ক হেৰুৱাই অসহায় হৈ পৰা অসংখ্য পৰিয়ালৰ মৃত লোকৰ শৱদেৱ সৎকাৰত সহায় কৰি দেৱদূতৰ ভূমিকাত অৱতীর্ণ হোৱা ধৃতিমালা ডেকাই এইপর্যন্ত পাঁচ শতাধিক শৱদেৱ সৎকাৰত সহায় কৰিছে৷ নৱগ্রহ শ্মশানৰ উপৰি ভূতনাথ, বশিষ্ঠকে ধৰি বিভিন্ন শ্মশানত মৃতদেহৰ অন্ত্যেষ্টিক্রিয়াত ভাগ লৈ এইগৰাকী সাহসী মহিলাই বহু দৰিদ্র লোকলৈ সহায়ৰ হাত আগবঢ়াই আহিছে৷ মাজনিশাও ফোনকল পালেই শ্মশানলৈ দৌৰি অহা ধৃতিমালাই এনে অগতানুগতিক অথচ সমাজৰ বাবে অতিকৈ উপযোগী কার্যৰ বাবে ইতিমধ্যে ৰাজ্য চৰকাৰৰ পৰা লাভ কৰিছে অসম গৌৰৱৰ দৰে সন্মান৷ বিজেপি দলৰ এগৰাকী নেত্রী হিচাপেও বিভিন্ন সামাজিক কাম–কাজত সহায় কৰা এইগৰাকী মহিলাৰ বাবে শ্মশান এতিয়া চিৰলগৰী৷ শ্মশানতে জীৱনৰ প্রতিটো সত্য বিচাৰি পোৱা ধৃতিমালা ডেকাৰ সৈতে হোৱা এক আছুতীয়া সাক্ষাৎকাৰ ‘নিয়মীয়া বার্তা’ৰ পঢ়ুৱৈসকললৈ আগবঢ়োৱা হ’ল–
আপোনাৰ জন্মস্থান আৰু শৈশৱ ক’ত অতিবাহিত কৰিছিল? সৰুতে আপুনি অন্ত্যেষ্টিক্রিয়াৰ নিচিনা কার্যত জড়িত হৈ পৰিব বুলি ভাবিছিল নেকি?
মোৰ জন্ম গুৱাহাটী মহানগৰীৰ চেনীকুঠিত৷ পিতৃৰ নাম প্রয়াত ৰবীন ডেকা আৰু মাতৃ বনানী ডেকা৷ শিলপুখুৰীৰ মহর্ষি বিদ্যামন্দিৰৰ পৰা মই মেট্রিক পৰীক্ষাত উত্তীর্ণ হোৱাৰ পিছত ইগন’ৰ পৰা স্নাতক ডিগ্রী লাভ কৰিছোঁ৷ স্কুলত পঢ়ি থকা সময়ত এথলেটিকছ আৰু ভলীবল খেলিছিলোঁ৷ তদুপৰি এনচিচিৰ সৈতেও মই জড়িত হৈ পৰিছিলোঁ৷ অন্য ছোৱালীৰ দৰেই এটি গতানুগতিক জীৱন যাপন কৰিব বিচৰা নাছিলোঁ যদিও কেতিয়াও শৱদেহ সৎকাৰৰ দৰে কার্যত জড়িত হৈ পৰিম বুলি ভবা নাছিলোঁ৷ অৱশ্যে এতিয়া এই কার্যই মোক অনাবিল আনন্দ দিয়ে৷
আপুনি এগৰাকী মহিলা সত্ত্বেও মৃতদেহ সৎকাৰৰ দৰে কার্যত জড়িত হৈ পৰিছে৷ এইক্ষেত্রত আপুনি কাৰ পৰা অনুপ্রাণিত হৈছিল?
মই সৰুৰে পৰা দেখিছোঁ দেউতাই নৱগ্রহ শ্মশানত মৃতদেহ সৎকাৰত সহায় কৰিছিল৷ চেনীকুঠিত এটা সময়ত ডেকা ষ্টোৰ নামেৰে এখন পৰিচিত গেলামালৰ দোকান আছিল৷ সেই সময়ত টেলিফোনৰ ব্যৱস্থা নাছিল যদিও দেউতাৰ দোকানলৈ আহি মানুহে তেওঁক মৃতদেহ সৎকাৰৰ বাবে সহায় বিচাৰিছিল৷ সেই অনুসৰি দেউতাই যথাসম্ভৱ সহযোগিতা কৰিছিল আৰু প্রতিদিনে মৃতদেহ সৎকাৰ কৰিবলৈ গৈছিল৷ ঘৰৰ মই ডাঙৰ ছোৱালী যদিও মই পুত্র সন্তানৰ দৰে দেউতাক সহায় কৰিছিলোঁ৷ ২০১০–১১ চনত দেউতা অসুস্থ হৈ পৰাত মোক তেওঁ শ্মশানলৈ পঠিয়াইছিল৷ কোনোবাই ফোন কৰি সহায় বিচাৰিলে মোক দেউতাই মৃতদেহ সৎকাৰৰ বাবে সহায় কৰিবলৈ পঠিয়াইছিল৷ ২০১৬ চনৰ পৰা মই এই কার্যত নিয়মীয়াভাৱে জড়িত হৈ পৰিলোঁ৷ তেতিয়াৰ পৰা এইপর্যন্ত মই প্রায় প্রতিদিনে মৃতদেহ সৎকাৰৰ ক্ষেত্রত সহায় কৰি আহিছোঁ৷
এগৰাকী মহিলা হোৱা সত্ত্বেও শৱদাহৰ দৰে কার্যত জড়িত হোৱাত সমাজ অথবা পৰিয়ালৰ পৰা বাধাৰ সন্মুখীন হৈছিল নেকি? এইক্ষেত্রত আপুনি কোনো তিক্ততাপূর্ণ অভিজ্ঞতা আহৰণ কৰিছে নেকি?
মোৰ দেউতা যিহেতু এনে এক মহান কার্যৰ সৈতে জড়িত হৈ আহিছে, গতিকে পৰিয়ালৰ ফালৰ পৰা কেতিয়াও এইক্ষেত্রত বাধাৰ সন্মুখীন হোৱা নাছিলোঁ৷ আনকি সমাজৰ ফালৰ পৰাও কোনেও মোক এনে কার্য বেয়া বুলি কোৱা নাছিল৷ ইয়াৰ বিপৰীতে সকলোৱে মোক প্রশংসাহে কৰিছিল৷ বিশেষকৈ নৱগ্রহ শ্মশান সমিতিৰ সভাপতি বলেন্দ্র ভৰালী, সম্পাদক প্রবীণ বৰঠাকুৰ আৰু কোষাধ্যক্ষ জয়ন্ত বৰুৱাই মোক যথেষ্ট সহায় আৰু অনুপ্রাণিত কৰিছিল৷ তেওঁলোকেই মোক মৃতদেহ সৎকাৰৰ বাবে প্রয়োজনীয় সকলো নীতি–নিয়ম শিকাই দিছিল৷ ইয়াৰ উপৰি যিসকল লোকৰ পৰিয়ালৰ মৃত্যু হয় তেওঁলোকৰ ফালৰ পৰাও সৎকাৰত সহায় কৰাৰ বাবে প্রশংসা লাভ কৰি আহিছোঁ৷ আনকি বহু বয়োজ্যেষ্ঠ লোকে মৃতদেহ সৎকাৰৰ পিছত মোক ভৰি চুই সেৱা জনাই আশীর্বাদ দিয়ে৷ এনে কার্যই মোক এই কামত অধিক মনোযোগেৰে আগবাঢ়িবলৈ উৎসাহিত কৰে৷ মহিলাসকলৰ মৃতদেহ সৎকাৰৰ বাবে মোক বহুতে বিচাৰে৷ অৱশ্যে পুৰুষৰ মৃতদেহ সৎকাৰতো মই সমানে অংশগ্রহণ কৰি আহিছোঁ৷ মাজনিশা ফোন কৰি বিচাৰিলেও মই ঘৰত থকা সময়ত যিকোনো প্রকাৰে শ্মশানত উপস্থিত হওঁ৷ আনকি বহু লোকে শ্মশানলৈ শৱদেহ অনাৰ পূর্বেই শ্মশান সমিতিৰ জৰিয়তে মোক বিচাৰে৷ অৱশ্যে বিয়াৰ পিছত মই এই কার্যত কিছু বাধাৰ সন্মুখীন হৈছিলোঁ৷ সন্তান দুটা সৰু হৈ থকা বাবে এই কার্যক লৈ স্বামীৰ সৈতে প্রায়ে মনোমালিন্য হৈছিল আৰু ইয়াৰ বাবে আমাৰ মাজৰ সম্পর্ক ক্রমান্বয়ে বেয়া হৈ আহিছিল৷ হয়তো সেইবাবে আমাৰ বিবাহ বিচ্ছেদো হ’ল৷ এতিয়া মই সম্পূর্ণ সময় শ্মশানলৈ অনা মৃতদেহ সৎকাৰত মনোনিৱেশ কৰিব পাৰিছোঁ৷
আপুনি এই পর্যন্ত কিমান মৃতদেহ সৎকাৰ কৰিছে? বিশিষ্ট ব্যক্তিসকলৰ অন্ত্যেষ্টিক্রিয়াতো আপুনি ভাগ লোৱাৰ সৌভাগ্য লাভ কৰিছেনে?
২০১৬ চনৰ পৰা এই পর্যন্ত মই ৫ শতাধিক মৃতদেহৰ সৎকাৰত অংশগ্রহণ কৰি বহু অসহায় পৰিয়ালক সহায় কৰিছোঁ৷ শিশুৰ পৰা বৃদ্ধলৈকে আৰু দুর্ঘটনাত প্রায় নিশ্চিহ্ণ হৈ পৰা বহু মৃতদেহ সৎকাৰ কৰিছোঁ৷ অৱশ্যে এইক্ষেত্রত মোৰ বহু বিশিষ্ট ব্যক্তি তথা সাহিত্যিক, শিল্পীৰ মৃতদেহ সৎকাৰ কৰাৰ সৌভাগ্য ঘটিছে৷ প্রাক্তন মুখ্যমন্ত্রী তৰুণ গগৈ, বিশিষ্ট কণ্ঠশিল্পী দীপালী বৰঠাকুৰ, চিত্রশিল্পী নীলপৱন বৰুৱা, বিশিষ্ট অভিনেতা নিপন গোস্বামী, ডিজিপি খগেন শর্মা আৰু শেহতীয়াকৈ শিক্ষাবিদ, গায়িকা লক্ষহীৰা দাসৰ অন্ত্যেষ্টিক্রিয়া সম্পন্ন কৰিছোঁ৷ কেতিয়াবা এদিনত ৬–৭টা মৃতদেহ সৎকাৰ কৰিবলগীয়া হৈছে৷ আনকি গোটেই নিশা মৃতদেহ সৎকাৰ কৰি পুৱা ঘৰলৈ উভতি গৈছোঁ৷ এই কার্যত যথেষ্ট কষ্ট হয় যদিও এনে কার্যই মনত অপাৰ আনন্দও দিয়ে৷
প্রায় এটা দশক ধৰি আপুনি মৃতদেহ সৎকাৰৰ দৰে কার্যত জড়িত হৈ আছে৷ এই কার্যৰ স্বীকৃতি হিচাপে আপুনি অসম গৌৰৱৰ দৰে সন্মানো লাভ কৰিছে৷ এইক্ষেত্রত আপোনাৰ অনুভৱ কেনে?
২০২২ চনৰ অসম গৌৰৱ বঁটা মই ২০২৩ চনত লাভ কৰিছিলোঁ৷ এই বঁটাই মোক এটা নতুন পৰিচয় প্রদান কৰিলে৷ ইয়াৰ আগলৈকে মোক সকলোৱে ৰবীনৰ জীয়েক বুলিহে জানিছিল৷ কিন্তু অসম গৌৰৱ বঁটা লাভ কৰাৰ পাছত মই ৰবীনৰ জীয়েকৰ পৰা ধৃতিমালা হ’লোঁ৷ অৱশ্যে এই বঁটা লাভ কৰাৰ পিছত বহু মানুহ মোৰ পৰা আঁতৰি গ’ল৷ যিসকল মানুহে নিজৰ স্বার্থৰ বাবে মোক আঁকোৱালি লৈ আছিল, সেইসকল লোকক এই সন্মানে অসন্তুষ্ট কৰিলে৷ ইয়াৰ লগে লগে মই বহু মানুহৰ মুখাৰ আঁৰৰ মানুহবোৰ চিনি পালোঁ৷ এনে এটি সন্মান প্রদান কৰাৰ বাবে মই মাননীয় মুখ্যমন্ত্রী ড০ হিমন্ত বিশ্ব শর্মাক অশেষ ধন্যবাদ জনাইছোঁ৷ বহুতে ভাবিছিল যে বঁটা লাভ কৰাৰ পাছত মই এই কাম এৰি দিম৷ বহুতে প্রশ্ণ কৰে এতিয়াও তুমি শৱদেহ সৎকাৰৰ কাম কৰি আছা নেকি? আচলতে কোনো উদ্দেশ্য লৈ এই কামত জড়িত হোৱা নাছিলোঁ৷ সেই কাৰণে বঁটা লাভ কৰাৰ পাছতো মই এনে কার্যত জড়িত হৈ আছোঁ৷ বহু জ্যেষ্ঠ লোকে যেতিয়া মোক চৰণ চুই সেৱা কৰে তেতিয়া মই ভাবোঁ যে নিশ্চয় ভাল কাম কৰি আছোঁ৷ মই যিমান মানুহক সহায় কৰিছোঁ তাৰ ফলো লাভ কৰিছোঁ৷ বিপদৰ সময়ত ধৃতিমালা কেতিয়াও অকলশৰীয়া নহয়৷ এই সময়ছোৱাত বহু ভাল মানুহৰ লগত মোৰ সম্পর্ক ঘটিছে আৰু বিপদৰ সময়ত তেওঁলোক মোৰ ওচৰত থিয় দিয়ে৷ অসম গৌৰৱ বঁটা লাভ কৰাৰ সময়ত মোৰ মা দুৰাৰোগ্য ৰোগত আক্রান্ত হৈছিল৷ সেই সময়তে লাভ কৰা এই বঁটাই মাৰ মনোবল বৃদ্ধি কৰিছিল৷ তেওঁ কৈছিল– তই ইকৰাৰ ভঙাঘৰলৈ গৌৰৱ কঢ়িয়াই আনিলি৷ মা এতিয়া যথেষ্ট পৰিমাণে সুস্থ৷ সেইবাবে এই বঁটা মোৰ বাবে অমূল্য৷
আপুনি বিজেপি দলৰ নেত্রীৰ দায়িত্বত আছে৷ এইক্ষেত্রত আপোনাৰ সময়ৰ ব্যস্ততাই অসুবিধাৰ সৃষ্টি নকৰে নেকি?
হয়, মই দীর্ঘদিন ধৰি নিঃস্বার্থভাৱে বিজেপি দলৰ হৈ কাম কৰি আহিছোঁ৷ এতিয়া মই দলৰ গুৰুত্বপূর্ণ দায়িত্বও লাভ কৰিছোঁ৷ কিন্তু মই মোৰ কামত কেতিয়াও বাধাৰ সন্মুখীন হোৱা নাই৷ দলৰ প্রাক্তন সভাপতি ভবেশ কলিতা আৰু বর্তমানৰ সভাপতি দিলীপ শইকীয়াই মোক এইক্ষেত্রত যথেষ্ট সহায় আগবঢ়াই আহিছে৷ আনকি দলৰ গুৰুত্বপূর্ণ বৈঠকৰ সময়ত শ্মশানৰ পৰা মৃতদেহ সৎকাৰৰ বাবে ফোন আহিলে তেওঁলোকে মোক যাবলৈ অনুমতি দিয়ে৷ আনকি দলৰ গাড়ীৰে মোক শ্মশানত থৈ অহাৰ ব্যৱস্থাও কৰি দিয়ে৷ এইক্ষেত্রত মোক বিজেপি নেত্রী আঙুৰলতা ডেকাই যথেষ্ট সহযোগিতা কৰিছে৷ সেইবাবে মই দলৰ দায়িত্বত থাকিলেও মোৰ কামত বাধাৰ সন্মুখীন হোৱা নাই৷
এগৰাকী মহিলা সত্ত্বেও সোঁতৰ বিপৰীতে গৈ এক অগতানুগতিক কার্যত আপুনি জড়িত হৈ পৰিছে৷ মহিলা সম্পর্কে আপুনি কেনে ধাৰণা পোষণ কৰে৷ মহিলাসকলে এতিয়াও প্রাপ্যৰ পৰা বঞ্চিত বুলি আপুনি অনুভৱ কৰে নেকি?
মহিলাসকল যথেষ্ট আৱেগিক৷ তেওঁলোকৰ ভাল দিশবোৰ আৱেগে ধুই নিয়ে৷ তদুপৰি আমাৰ দুখৰ পৰিমাণো বেছি৷ কিন্তু সহ্য আৰু ধৈর্য পুৰুষতকৈ বহুগুণে বেছি৷ কিন্তু অত্যধিক আৱেগিক হোৱা বাবে আমি বহুক্ষেত্রত পিছ পৰি ৰ’বলগীয়া হয়৷ ইয়াৰ উপৰি মহিলাসকলৰ আত্মবিশ্বাস বৰ কম৷ আত্মবিশ্বাস নথকা বাবেই পুৰুষসকলে মহিলাক তলত ৰাখিবলৈ চেষ্টা কৰে৷ সেইবাবেই নাৰীসকল আত্মবিশ্বাসী হোৱাটো অতি প্রয়োজন৷ মই নিজেও অতিশয় আত্মবিশ্বাসী৷ আমি নাৰীসকলে নিজতকৈ আনৰ কথা বেছিকৈ ভাবোঁ৷ কিবা এটা কৰিলে এই কামটো আনে কেনে দৃষ্টিৰে চায়, সেই কথা বেছিকৈ ভাবোঁ৷ তেনে মনোভাব দূৰ কৰি নিজৰ কর্মত গুৰুত্ব দিব লাগিব৷ নাৰী এগৰাকীয়ে নিজৰ সপোন পূৰণত দৃঢ় প্রতিজ্ঞ হ’ব লাগিব৷ ইয়াৰ সমান্তৰালকৈ ঘৰখনৰ উৎসাহ আৰু সহযোগিতাৰ লগতে সমাজৰো সহায় লাগিব৷ সদায় নিজৰ লগত প্রতিযোগিতা কৰিলেহে নাৰীয়ে বিশ্ব জয় কৰিব পাৰিব৷
বিগত দীর্ঘসময় আপুনি শ্মশানত যথেষ্ট সময় অতিবাহিত কৰিছে৷ শ্মশান সম্পর্কে আপোনাৰ ধাৰণা কি?
শ্মশান মোৰ বাবে জীয়াই থকাৰ মন্ত্র৷ সকলো মানুহেই এদিন শ্মশানলৈ আহিবই লাগিব৷ সেই কথা পাহৰি মানুহে বিভিন্ন অপকর্মত লিপ্ত হয়৷ মোৰ মতে শ্মশান মন্দিৰৰ দৰে৷ মন্দিৰত প্রয়োজন হোৱা ধূপ–চাকি, ফুল আদি শ্মশানতো প্রয়োজন হয়৷ সেইবাবে শ্মশানক সকলোৱে মন্দিৰ হিচাপে গণ্য কৰিব লাগে৷ শ্মশান মোৰ বাবে সাহসৰ উৎস৷
আপোনাৰ জীৱনত সর্বাধিক প্রভাৱ পেলোৱা ব্যক্তিগৰাকী কোন?
নাৰীসকলৰ জীৱন পুৰুষসকলে বিষময় কৰি তোলে আৰু পুৰুষেই জীয়াই থকাৰ প্রেৰণা দিয়ে৷ মোৰ জীৱনতো এই কথাষাৰ ভালদৰে প্রযোজ্য হয়৷ মোক পুৰুষখিনিয়ে পতনৰ বাবে চেষ্টা চলাইছে আৰু একাংশ পুৰুষেই উৎসাহ আৰু উত্থান আনি দিছে৷ মই যেতিয়া স্বামীৰ দ্বাৰা লাঞ্ছিত হৈ অসহায় হৈ পৰিছিলোঁ, সেই সময়তে মোৰ ওচৰত থিয় দিছিল এগৰাকী বন্ধু প্রাণজিৎ দত্ত৷ তেওঁ মোৰ প্রতিটো কার্যতে সহায় কৰি বর্তমান অৱস্থাত উপনীত হোৱাত সহায় কৰিছে৷ মোৰ জীৱনত তেওঁৰ প্রভাৱ কেতিয়াও অস্বীকাৰ কৰিব নোৱাৰোঁ৷ মোৰ পিতৃয়েও সৰুৰে পৰা মোক বিভিন্ন ধৰণে অনুপ্রাণিত কৰিছে৷ তদুপৰি এসময়ত শ্মশান বন্ধু হিচাপে পৰিচিত ধ্রুৱপ্রসাদ চলিহা, ললিত নাথ, হীৰামন চৌধুৰী আদি ব্যক্তিৰ প্রভাৱ মোৰ জীৱনত যথেষ্ট পৰিছে৷
জীৱন সম্পর্কে আপোনাৰ ধাৰণা কি?
আচলতে মানুহৰ জীৱনটো এক মহাশূন্য৷ জন্মৰ পৰা মৃত্যুলৈ এই সময়খিনি আমি এখন নাটকত অভিনয় কৰি যাওঁ৷ ওপৰৰ জনাই আমাৰ বাবে এখন চিত্রনাট্য ইতিমধ্যে লিখি থৈছে৷ আমি বিচৰা বস্তুটো নাপালে অথবা ভবা মতে কামবোৰ নহ’লে খং কৰোঁ আৰু হতাশ হওঁ৷ আচলতে চিত্রনাট্যত লিখি থোৱাৰ দৰেহে আমাৰ জীৱনটো আগবাঢ়ে৷ মায়া–মোহত আবদ্ধ হৈ আমি এই সকলো কথা পাহৰি যাওঁ৷ সেইবাবেই যিখিনি পাইছোঁ সেইখিনিক লৈ সন্তুষ্ট হ’ব লাগে৷ তেতিয়া মানুহ সুখী হ’ব পাৰে৷ আমি কোন মুহূর্তত এই পৃথিৱী এৰি গুচি যাওঁ তাৰ ঠিকনা নাই৷ গতিকে বহুত কিবাকিবি বিচাৰি জীৱনটো অশান্ত কৰাৰ অর্থ নাই৷
আপুনি শ্মশানত কটোৱা সময়ছোৱাত কিবা অভিজ্ঞতাৰ সন্মুখীন হৈছে নেকি?
মই মৃতদেহ সৎকাৰৰ ক্ষেত্রত বিভিন্ন অভিজ্ঞতাৰ সন্মুখীন হৈছোঁ৷ বহু শিশুৱে পিতৃ–মাতৃক মুখাগ্ণি কৰা দেখিছোঁ আৰু স্বামীৰ মৃতদেহ লৈ অসহায় হৈ পৰা বহু মহিলাক মই লগ পাইছোঁ৷ এইবোৰ দৃশ্যই মোক যথেষ্ট প্রভাৱিত কৰিছে৷ সাধাৰণতে এটা মৃতদেহ দুঘণ্টামানৰ ভিতৰত সৎকাৰ কৰা কাম সম্পূর্ণ হয়৷ কিন্তু এবাৰ এজনৰ মৃতদেহ ৰাতি ১০ বজাৰ পৰা পুৱা ৫ বজালৈ জ্বলাবলগীয়া হৈছিল৷ শেষৰফালে মুখাগ্ণি কৰা দুজনমান আৰু মোৰ বাহিৰে তাত কোনো নাছিল৷ বহু লোকে মৃতদেহ জ্বলাবলৈ আহি নিশা মদ্যপান কৰে৷ তেনে লোকৰ লগতো মই নিশা কটাবলগীয়া হৈছে৷ অৱশ্যে মদ্যপান কৰিলেও তেওঁলোকৰ পৰা কোনো বেয়া ব্যৱহাৰৰ সন্মুখীন হোৱা নাই৷ তেওঁলোকে চাগে মোৰ সাহস দেখি বিস্মিত হৈ পৰে৷ নিশা অন্ত্যেষ্টিক্রিয়াত ভাগ ল’লে কষ্ট বেছি হয় যদিও মনৰ মাজত এক বুজাব নোৱাৰা আনন্দ লাভ কৰা যায়৷
আপোনাৰ ভৱিষ্যৎ পৰিকল্পনা সম্পর্কে জনাব নেকি?
ৰাজনীতিৰ লগত জড়িত হৈ আছোঁ যেতিয়া এইক্ষেত্রখনত আগবাঢ়ি যাব বিচাৰোঁ৷ অৱশ্যে ইয়াৰ মাজতো মই মৃতদেহ সৎকাৰৰ কার্যত সদায় নিয়োজিত হৈ থাকিম৷ কেৱল নৱগ্রহ শ্মশানতে নহয়, মই ৰাজ্যৰ অন্য ঠাইলৈও যোৱাৰ বাবে চেষ্টা কৰিছোঁ৷ ইতিমধ্যে নলবাৰীতো এই কার্য সম্পাদন কৰিছোঁ৷ মই পেছমেকাৰ লগোৱাৰ পিছত বহুতে ভাবিছিল যে মোৰ এই কামৰ যৱনিকা পৰিল৷ সেইসকলক মই ক’ব খোজোঁ যে জীয়াই থকালৈকে মই মহান কার্যৰ সৈতে জড়িত হৈ থাকিম৷