নিয়মীয়া বাৰ্তা, ১৩ ফেব্ৰুৱাৰীঃ বিশ্বৰ দুই দুর্ধর্ষ বেগী বলাৰ যশপ্রীত বুমৰাহ আৰু জ’ফ্রা আর্চাৰক আগন্তুক আই পি এলত মুম্বাই ইণ্ডিয়ানছৰ জার্ছীত একেলগে দেখিবলৈ পোৱা যাব৷ ৰোহিত শর্মা নেতৃত্বাধীন দলটোৱে আজি ইংলেণ্ডৰ তাৰকা বেগী বলাৰ আর্চাৰক ৮ কোটিত ক্রয় কৰে৷ বাংগালুৰুত অনুষ্ঠিত আই পি এলৰ মেগা নিলামৰ দ্বিতীয় দিনা সাম্প্রতিক বিশ্ব ক্রিকেটৰ অন্যতম দুর্ধর্ষ বেগী বলাৰ হিচাপে পৰিচিত আৰ্চাৰক বৃহৎ ধনৰাশিৰে তেওঁলোকৰ শিবিৰলৈ আনে৷ আজি নিলামৰ আকৰ্ষণ হৈ পৰিল জোফ্ৰা আৰ্চাৰ। তাৰকা পেচ বলাৰগৰাকীক পাবলৈ মুম্বাই, হায়দৰাবাদ আৰু ৰাজস্থানৰ মাজত টনা-আঁজোৰা লাগে। অৱশেষত আৰ্চাৰক মুম্বাই ইণ্ডিয়ানছে ৮ কোটি টকাত ক্ৰয় কৰে। তাৰকাগৰাকীৰ মুম্বাইত স্থান নিশ্চিত হোৱাৰ লগে লগে চৰ্চা পাইছে বুমৰাহ-আৰ্চাৰ যুটিৰ কথা। দুয়ো তাৰকাৰ তীক্ষ্ণ বলিঙে উত্তেজনা বঢ়াব আইপিএলৰ। দুয়োগৰাকী তাৰকাৰ বলিং একচনত ত্ৰাহি মধুসূদন সুঁৱৰিৱ লাগিব যিকোনো বেটিং তাৰকাই। যোৱা বছৰ বুমৰাহ-বল্টৰ যুটিয়ে উইকেটত ত্ৰাস সৃষ্টি কৰিছিল। আৰ্চাৰ তীক্ষ্ণ বাউঞ্চে নিশ্চিতভাৱে প্ৰতিপক্ষক বিপদত পেলাব। মুম্বাইৰ জয়ৰ পৰিকল্পনাত জোফ্ৰা আৰ্চাৰৰ পৰা অৱদান আশা কৰিব দলীয় মেনেজমেণ্টে। লগতে সময়োপযোগী বলিঙেৰে সদায় ধৰাশায়ী কৰি অহা বুমৰাহৰ কথা উল্লেখ কৰাৰ প্ৰয়োজন নাই। য়ৰ্কাৰ, বাউঞ্চ তথা মিতবয়ী বলিঙেৰে যিকোনো মুহূৰ্তত খেলৰ গতি সলনি কৰিব পাৰে বুমৰাহে। গতিকে সমাগত আইপিএলত আৰ্চাৰ-বুমৰাহৰ ওপৰত অনুৰাগীৰ দৃষ্টি নিবদ্ধ থাকিব। মার্চ–এপ্রিলত অনুষ্ঠিত হ’বলগীয়া বিচিচিআইৰ ঐশ্বর্যশালী টি–২০ লীগ আই পি এলৰ দুই এখন মেচত আর্চাৰে খেলপথাৰত নামিলে ক্রিকেট অনুৰাগীয়ে বিশ্বৰ দুই দুর্ধর্ষ বেগী বলাৰক একেলগে খেলা দেখিবলৈ পাব৷ কিয়নো মুম্বাই ইণ্ডিয়ানছৰ শিবিৰত পূর্বৰে পৰা আছে বিশ্বৰ আন এগৰাকী দুর্ধর্ষ বেগী বলাৰ যশপ্রীত বুমৰাহ৷ বুমৰাহ আৰু আর্চাৰৰ দৰে তীব্র বেগী বলাৰৰ সন্মুখীন হোৱাটো আই পি এলৰ যিকোনো দলৰ বাবে তীব্র প্রত্যাহ্বানস্বৰূপ হ’ব৷