নিয়মীয়া বাৰ্তা, ইটাখোলা, ২১ মাৰ্চঃ অসম মুণ্ডা সমাজৰ অন্তৰ্গত ইটাখোলাৰ সমীপৰ মনাই চাহ বাগিচাত মনাইৰ মুণ্ডা সমাজে দেওবাৰে দিনযোৰা কাৰ্যসুচীৰে অনুষ্ঠিত কৰে চাৰণ উৎসৱ৷ নতুন বছৰক আদৰাৰ উদ্দেশ্যৰেই এই চাৰণ উৎসৱ আয়োজন কৰা বুলি জানিবলৈ দিয়ে উদ্যোক্তাসকলে৷ বিভিন্ন ধৰ্মীয় ৰীতি-নীতিৰ মাজেৰে উদযাপন কৰা চাৰণ উৎসৱৰ লগত সংগতি ৰাখি মুণ্ডা সমাজৰ বিভিন্ন কলা-সংস্কৃতিও পৰিবেশন কৰে ৷ উৎসৱত অংশ গ্ৰহণ কৰি চতিয়া আঞ্চলিক পঞ্চায়তৰ সভাপতি লক্ষীকান্ত বৰাই কয়- মুণ্ডা সমাজ অসমৰ এক বৃহৎ শক্তিশালী অনুষ্ঠান৷ এই চাৰণ উৎসৱৰ জৰিয়তে মুণ্ডা সমাজে নিজৰ ঐতিহ্য পৰম্পৰা ৰক্ষা কৰাত সফল হৈছে ৷ মুণ্ডা সমাজৰ কৃষ্টি সংস্কৃতি আমি সকলোৱে সন্মান কৰা উচিত বুলি মন্তৱ্য কৰে সভাপতি লক্ষীকান্ত বৰাই ৷ উক্ত অনুষ্ঠানত উপস্থিত থাকে নাগশংকৰ জিলা পৰিষদৰ সদস্য হিতেশ বৰুৱাৰ লগতে বহুকেইজন গন্য মান্য ব্যক্তি।