নিয়মীয়া বাৰ্তা, ২৪ মাৰ্চঃ আজি ধুবুৰীৰ এজন ব্যাক্তিৰ কান্ধত থকা ধন মোনা এটা থপিয়াই পলাবলৈ চেষ্টা কৰা বহিঃৰাজ্যৰ এজন চিলনী চোৰক ৰাইজে কৰায়ত্ব কৰি আৰক্ষীক গতাই দিয়াৰ এক চাঞ্চল্যকৰ ঘটনা পোহৰলৈ আহিছে। ঘটনা সন্দৰ্ভে, জনৈক সুদীপ পাল নামৰ ধুবুৰীৰ স্থানীয় ব্যৱসায়ীয়ে সদৰি কৰানুসৰি আজি বজাৰৰ পৰা আহি নিজৰ ব্যৱসায়িক প্ৰতিষ্ঠানটো খুলিবলৈ যোজা চলাই থাকোঁতে অকষ্মাতে এজন ব্যক্তিয়ে তেওঁৰ কান্ধত থকা ধনৰ মোনাটো থপিয়াই লৈ পলাবলৈ চেষ্টা কৰে। সেয়া প্ৰত্যক্ষ কৰি পালৰ দোকানৰ এগৰাকী কৰ্মচাৰীয়ে চিলনী চোৰজনলৈ খেদি যায় আৰু সেয়া প্ৰত্যক্ষ কৰি চোৰজনে চুৰি কৰা মোনাটো দলিয়াই পেলাই দি দৌৰি পলাবলৈ চেষ্টা কৰে যদিও অকষ্মাতে ৰাজপথতে পৰি যায়। ইপিনে ঘটনাটো অৱগত হৈ ঘটনাস্থলীত উপস্থিত হোৱা ৰাইজে চোৰটোক কৰায়ত্ব কৰি উত্তম–মধ্যম সোধায় আৰু আৰক্ষীক চমজাই দিয়ে। ধৃত চিলনী চোৰজন চুবুৰীয়া পশ্চিমবংগৰ জনৈক ৰীতেশ গোৱালা বুলি জানিব পৰা গৈছে।