শিল্পী তৰালী শৰ্মালৈ ভিতালী দাস সোঁৱৰণি বঁটা

নিয়মীয়া বাৰ্তা,৫ এপ্ৰিল : ২০২১ চনৰ এপ্ৰিল মাহৰ‌ ২১ তাৰিখটো অসমৰ সাংস্কৃতিক জগতৰ বাবে এটি বিষাদৰ দিন । এই দিনটোতে ক’ভিদত আক্ৰান্ত হৈ অকালতে চিৰ দিনৰ বাবে আঁতৰি ‌গৈছিল উত্তৰ গুৱাহাটীৰ জীয়ৰী তথা অসমৰ জনপ্ৰিয় কন্ঠশিল্পী ভিতালী দাস । ভিতালী দাসৰ মহাপ্ৰয়াণ অসমৰ সংগীত জগতৰ বাবে এক অপূৰণীয় ক্ষতি । শ্ৰুতি‌ মধুৰ কন্ঠৰে অজস্ৰ জনৰ হৃদয় জয় কৰা ভিতালী দাসৰ অহা‌ ২১ এপ্ৰিলত’ প্ৰথম‌ মৃত্যু বাৰ্ষিকী । প্ৰথম মৃত্যু বাৰ্ষিকী উপলক্ষে উক্ত দিনা উত্তৰ গুৱাহাটী সাংবাদিক সন্থাৰ উদ্যোগত আৰু দিহিংসত্ৰ জ্ঞান বিকাশ পুথিভঁৰালৰ সহযোগত  গুৱাহাটী প্ৰেছ ক্লাবত এক বিশেষ শ্ৰদ্ধাঞ্জলি অনুষ্ঠানৰ আয়োজন কৰা হৈছে । লগতে শিল্পী গৰাকীৰ স্মৃতি যুগমীয়া কৰিবলৈ এইবছৰৰ পৰা “উত্তৰ গুৱাহাটী সাংবাদিক সন্থাই”  শিল্পী ভিতালী দাসৰ সোঁৱৰণত এটা বঁটা আৰম্ভ কৰাৰ বাবেও সিদ্ধান্ত লৈছে । আৰু এইবেলি এই বঁটাৰ বাবে সন্থাই ভিতালী দাসৰ সংগীত জীৱনৰ দীৰ্ঘদিনীয়া সংগী শিল্পী তৰালী শৰ্মাক মনোনীত কৰিছে । উক্ত দিনা দিনৰ ১ বজাৰ পৰা অনুষ্ঠিত হ’ৱলগীয়া অনুষ্ঠানটোত শিল্পী তৰালী শৰ্মাক বটা প্ৰদান কৰিব বিশিষ্ট শিল্পী, চিকিৎসক অঞ্জন জ্যোতি চৌধুৰীয়ে । আয়োজক সমিতিয়ে সকলোৰে উপস্থিতি কামনা কৰিছে ।