নিয়মীয়া বাৰ্তা, ১৩এপ্ৰিলঃ অসমৰ বাপতি সাহোন, জাতীয় উৎসৱ ৰঙালী বিহুটিক আদৰিবলৈ প্ৰস্তুতি চলাই থকাৰ মাজতে আজি চিৰাং জিলাৰ বাসুগাঁও চহৰত অৱস্থিত গুৰুকুল নেচনেল স্কুলত প্ৰাক বিহু পালন কৰা হয় । অসমীয়াৰ বিহু, বড়ো জনগোষ্ঠীৰ ৰংজালী বৈশাগু, বেংগলীৰ পইলা বৈশাখ ইত্যাদি নামাকৰণেৰে পালিত অনুষ্ঠানটিৰ আৰাম্ভণিতে পতাকা উত্তোলনেৰে কাৰ্য্যসূচীৰ শুভাৰম্ভ কৰা হয় । পতাকা উত্তোলন কৰে স্কুলৰ অধ্যক্ষ বিজিত নাথ আৰু আমন্ত্ৰিত অতিথি সকলৰ দ্বাৰা বন্তি প্ৰজ্বলন কৰা হয় । ইয়াৰ অন্তত একাদিক্ৰমে বিহু নৃত্য, কোঁচ ৰাজবংশী জনগোষ্ঠীৰ কূশান, কাতিকা, গোৱালিনী, হুদুম, বড়ো জনগোষ্ঠীৰ বাগাৰুম্বা নৃত্যৰ উপৰি কবিতা আবৃত্তি, বিহু, বিষুৱা, বৈশাগু, পইলা বৈশাখৰ ওপৰত সাৱলীল ভাৱে একাংশ শিক্ষক-শিক্ষয়িত্ৰীয়ে মনোমোহাকৈ ব্যাখ্যা দাঙি ধৰে । বাৰে বাৰে যান্ত্ৰিক বিজুতিৰ মাজেদিও নিয়াৰিকৈ অনুষ্ঠানটি পৰিচালনা কৰে প্ৰিয়াংসী বসুমতাৰী, কংকনা বৰ্মন, সুশান উপাধ্যায়, সীমা ব্ৰহ্ম আদিয়ে । প্ৰবল উচ্ছাস-উদ্দীপনা, আনন্দ-উলাহ, হৰ্ষল্লাসৰ মাজত স্কুলৰ ছাত্ৰ-ছাত্ৰী, শিক্ষক-শিক্ষয়িত্ৰী, অতিথি-অভিভাৱক সকলোৱে গীতৰ তালে তালে, সুৰে-সুৰে একত্ৰিতভাৱে নাচি-বাগি পৰিবেশটিক অন্য মাত্ৰা প্ৰদান কৰে । সদৌ শেষত অসমৰ জাতীয় সংগীত ‘অ মোৰ আপোনাৰ দেশ’ সমজুৱা ভাৱে গীতটি পৰিবেশন কৰি কাৰ্য্যসূচী সামৰা হয় ।
প্ৰেৰক ভৃগু মুনি ৰায়