নিয়মীয়া বাৰ্তা, ২৩ এপ্রিলঃ পুনৰ বিতর্কৰ মাজত সোমাই পৰিছে মহম্মদ ছামিৰ পত্নী হাছিন জাহান৷ এইবাৰ হাছিনৰ বিৰুদ্ধে অভিযোগ কৰিছে তেওঁৰ পিতৃ মহম্মদ হুছেইনে৷ তেওঁৰ অভিযোগ অনুসৰি ভায়েকৰ সম্পত্তি বলপূর্বক দখল কৰিছে হাছিনে৷ ফলত তেওঁক সম্পত্তিৰ পৰা বহিষ্কাৰ কৰাৰ লগতে তেওঁৰ সৈতে সকলো সম্পর্ক ছিন্ন কৰাৰ ভাবুকি দিছে পিতৃয়ে৷ হুছেইনে জনাইছে যে তেওঁৰ একমাত্র পুত্র তাৰিক পাৰভেজ ওৰফে বান্তিৰ যোৱা বছৰ ক’ৰোনাত মৃত্যু হয়৷ তাৰ পিছতে হাছিনে বে–আইনীভাৱে বলপূর্বক তাৰিকৰ সকলো সম্পত্তি দখল কৰা বুলি পিতৃয়ে অভিযোগ কৰিছে৷ হুছেইনৰ অভিযোগ মতে, তাৰিকৰ দুখন ট্রাক, এখন গাড়ী, মটৰচাইকেল, হোটেল, পেট্র’ল পাম্প, কয়লা খনি দখল কৰিছে হাছিনে৷ আনকি তেওঁৰ সকলো জীৱন বীমাও তেওঁ হস্তগত কৰা বুলি অভিযোগ উত্থাপিত হৈছে৷ হুছেইনৰ আইনজীৱীয়ে জনাইছে যে মুছলিম পার্ছনেল ল’ অনুযায়ী পুত্রৰ মৃত্যু হ’লে তেওঁৰ সকলো সম্পত্তিৰ অধিকাৰী হয় পিতৃ৷ কোনো কাৰণতে সেই সম্পত্তি তেওঁৰ ভাই–ভনীয়ে নাপায়৷ হাছিনৰ মাতৃ নাজমা খাতুনে কন্যা হাছিনাৰ বিপক্ষে মাৰধৰৰ অভিযোগো কৰিছে৷ এই বিষয়ে কলকাতা উচ্চ ন্যায়ালয়ত গোচৰ দাখিল কৰিছে হাছিনৰ পিতৃয়ে৷