নিয়মীয়া বাৰ্তা, ১১ মে’:- ৰঙিয়াৰ মৰাণজানাস্থিত এছএছবিৰ মুখ্য কাৰ্যালয়ত স্বাধীনতাৰ অমৃত মহোৎসৱ উপলক্ষে বুধবাৰে সজাগতামূলক ৰক্তদান শিবিৰৰ আয়োজন কৰা হয় । উক্ত শিবিৰ উদ্বোধন কৰে এছএছবি গুৱাহাটী ফ্ৰন্টিয়াৰ মুখ্যালয়ৰ আইজি সঞ্জীৱ শৰ্মাই । ৰঙিয়াস্থিত এছএছবিৰ ডিআইজি জগদ্বীপ পাল সিঙৰ নেতৃত্বত আয়োজন কৰা এই শিবিৰত গুৱাহাটী মেডিকেল কলেজ হাস্পতলৰ ডাঃ দীপাংকৰ বৰুৱা আৰু পৰাগজ্যোতিৰ লগতে বহুকেইগৰাকী স্বাস্থ্য কৰ্মীয়ে সেৱা আগবঢ়ায় । দেশৰ সীমা সুৰক্ষাৰ লগতে এছএছবিয়ে সামাজিক দায়িত্ববোধেৰে কৰি অহা সেৱামূলক কামৰ অংশস্বৰূপে উক্ত ৰক্তদান শিবিৰ অনুষ্ঠিত কৰে । গুৱাহাটী চিকিৎসা মহাবিদ্যালয়ৰ ব্লাড বেংক বিভাগৰ সহযোগত আয়োজন কৰা এই শিবিৰত এছএছবিৰ বিষয়াৰ লগতে জোৱান সকলেও ৰক্তদান কৰে । উক্ত শিবিৰত স্বাধীনতাৰ ৭৫ বছৰ উপলক্ষে ৭৫ ইউনিট ৰক্তদান কৰা হয় । স্থানীয় বিদ্যালয়ৰ ভালে সংখ্যক ছাত্র-ছাত্ৰীৰ উপস্থিতিত ৰূপায়িত কাৰ্যসূচীৰ জৰিয়তে ৰক্তদান সন্দৰ্ভত সজাগতা সৃষ্টিৰ প্ৰয়াস কৰা হয় ।চিকিৎসাধীন সময়ত তেজৰ প্ৰয়োজন হোৱা ৰোগী সকলক সহায় কৰাৰ উদ্দেশ্যেৰে এই শিবিৰৰ আয়োজন কৰা হয় ।
প্ৰেৰক ফাৰুক হুছেইন