ধুবুৰী–গৌৰীপুৰ সংযোগী ৰাজপথত ভয়ংকৰ পথ দুৰ্ঘটনাঃ পথৰ দাঁতিত ৰৈ থকা ডাম্পাৰত খুন্দা তীব্ৰবেগী দুখন বলেৰ’ পিক্ আপ ভেনৰ
নিয়মীয়া বাৰ্তা, ৭ জুনঃ আজি ধুবুৰী আৰু ইয়াৰ পাৰ্শ্বৱৰ্তী গৌৰীপুৰ চহৰ সংযোগী ৰাজপথত সংঘটিত এক ভয়ংকৰ দূৰ্ঘটনাত ছয়গৰাকীকৈ ব্যক্তি গুৰুতৰভাৱে আহত হৈ চিকিৎসাধীন হ’বলগীয়া হোৱা বুলি জানিব পৰা গৈছে। ঘটনাটোৰ বিৱৰণী অনুসৰি, ধুবুৰী–গৌৰীপুৰ সংযোগী ৰাজপথটোৰ মদেৰগোলা নামৰ অঞ্চলৰ সমীপৰ সেই পথছোৱাৰ দাঁতিত ৰৈ আছিল বিপি৩এ,/০৮৭০ নামৰ শিলভৰ্তি ডাম্পাৰ। ৰৈ থকা সেই ডাম্পাৰখনত এএচ১৭চি/৩২১৫ আৰু এএচ১৭চি/৪৬৫৩ নম্বৰৰ দুখন তীব্ৰবেগী বালি ভৰ্তি বলেৰ’ পিক আপ্ ভেনে খুন্দা মাৰাৰ ফলত আজিৰ সেই শোকাৱহ পথ দুৰ্ঘটনাটো সংঘটিত হোৱা বুলি প্ৰকাশ। দুৰ্ঘটনাটোত আহত হোৱা আকিনুৰ ইছলাম, মজিনুৰ হক, ফুৰচান আহমেদ, গাটু, সাহিনুৰ ইছলাম আৰু হজৰতক ধুবুৰী মেডিকেল কলেজ হাস্পতালত ভৰ্তি কৰোৱা হোৱা বুলি জানিব পৰা গৈছে।
প্ৰেৰক অমিতাভ চক্ৰৱৰ্তী