নিয়মীয়া বার্তা, ১৩ জুনঃ বাক্সা জিলা আৰক্ষী প্রশাসনৰ উদ্যোগত আজি বাক্সা জিলা আৰক্ষী অধীক্ষকৰ কার্যালয়ৰ চৌহদত থকা প্রেক্ষাগৃহত এক সম্বর্ধনা অনুষ্ঠানৰ আয়োজন কৰা হয়৷ উক্ত অনুষ্ঠানত সদ্যঘোষিত হাইস্কুল শিক্ষান্ত পৰীক্ষাত বাক্সা জিলা আৰক্ষী পৰিয়ালৰ যিসকল লৰা–ছোৱালীয়ে সুখ্যাতিৰে উত্তীর্ণ হৈছে, তেওঁলোকক সম্বর্ধনা জনোৱা হয়৷ মুঠ বিশগৰাকী ছাত্র–ছাত্রীৰ ভিতৰত পাঁচগৰাকীয়ে ডিষ্টিংচন, চাৰিগৰাকীয়ে ষ্টাৰ নম্বৰ, সাতগৰাকীয়ে প্রথম বিভাগ আৰু তিনিগৰাকীয়ে দ্বিতীয় বিভাগ পাবলৈ সক্ষম হয়৷ কৃতী ছাত্র–ছাত্রী সৈতে অভিভাৱক উপস্থিত থকা সভাখনত মুখ্য অতিথি হিচাপে উপস্থিত থাকে বাক্সা জিলাৰ আৰক্ষী অধীক্ষক ৰাজেন সিং আৰু অতিৰিক্ত আৰক্ষী অধীক্ষক উজ্জ্বল বৰুৱা৷ মুখ্য অতিথিৰ ভাষণত আৰক্ষী অধীক্ষক আৰু অতিৰিক্ত আৰক্ষী অধীক্ষকে উপস্থিত থকা ছাত্র–ছাত্রীক উদ্দেশ্যে যথেষ্ট দিহা–পৰামর্শ তথা ভৱিষ্যৎ জীৱন সুন্দৰ আৰু নিজৰ লক্ষ্যত উপনীত হবলৈ সাহস আৰু মনোবল প্রদান কৰে৷ সভাখনৰ আঁত ধৰে আৰক্ষী উপ–পৰিদর্শক দেৱজিৎ বৰদলৈয়ে৷