নিয়মীয়া বাৰ্তা, ১৬ আগষ্টঃ অভয়াপুৰীৰ গৰু বজাৰৰ সমীপত আজি মুকলি হ’ল এখন দৈনিক পাইকাৰী বজাৰ। অভয়াপুৰী দৈনিক পাইকাৰী বজাৰখন আনুষ্ঠানিকভাবে মুকলি কৰে অভয়াপুৰী পৌৰ সভাৰ সভাপতি ৰমেন্দ্ৰ নাৰায়ণ বনিক্যই। এই পাইকাৰী বজাৰখনত উপলব্ধ হ’ব স্থানীয় কৃষকৰ উৎপাদিত শাক-পাচলিৰ লগতে আন আন অত্যাৱশ্যকীয় সামগ্ৰী। বজাৰখনৰ নাম দিয়া হৈছে “অভয়াপুৰী দৈনিক পাইকাৰী বজাৰ”। এই বজাৰখনে স্থানীয় কৃষক ৰাইজৰ সহায়ক হ’ব বুলি আশা কৰা হৈছে। ইয়াৰ উপৰিও গ্ৰাম্য অৰ্থনীতি কিছু পৰিমাণে হ’লেও আগবঢ়াই নিয়াত এই বজাৰখনে সহায় কৰিব। নিজৰ উৎপাদিত সামগ্ৰী বিক্ৰীৰ বাবে এখন নিৰ্দ্দিষ্ট বজাৰ লাভ কৰি যথেষ্ট উৎফুল্লিত অভয়াপুৰীৰ লগতে আন আন অঞ্চলৰ ৰাইজ। আজিৰ এই অনুষ্ঠানত অভয়াপুৰী পৌৰ সভাৰ সভাপতি ৰমেন্দ্ৰ নাৰায়ণ বনিক্য, বঙাইগাঁও জিলা বিজেপিৰ উপ-সভাপতি কৌস্তভ দাস, অভয়াপুৰী পৌৰ সভাৰ উপ সভাপতি জোনমনি পাঠক ৰাভাৰ লগতে স্থানীয় ৰাইজ আৰু ব্যৱসায়ী সকল উপস্থিত থাকে।
প্ৰেৰক বিনোদ বিহাৰী নাথ