নিয়মীয়া বাৰ্তা, ৩১ অক্টোবৰঃ কাৰ্বি আংলং জিলাৰ খটখটী থানাৰ আৰক্ষীয়ে কালি বিয়লি অভিযান চলাই বুজন পৰিমাণৰ বাৰ্মিজ ডালচেনি জব্দ কৰিবলৈ সক্ষম হৈছে। প্ৰাপ্ত তথ্য অনুসৰি, কালি বিয়লি খটখটী থানাৰ আৰক্ষীয়ে নিয়মীয়া তালাচীত মণিপুৰৰ পৰা গুৱাহাটী অভিমুখে আহি থকা এন এল -০৫-ডি-৮২১১ নম্বৰৰ ট্ৰাকখনত তালাচী চলোৱাৰ সময়ত বাহনখনৰ নথি-পত্ৰত বিসংগতি পোৱাত ট্ৰাক খনত তালাচী চলাই ২১০ টা বস্তাত প্ৰায় ৪৮ কুইন্টল বাৰ্মিজ ডালচেনি উদ্ধাৰ কৰে। অবৈধ ভাৱে সৰবৰাহ কৰা সামগ্ৰীখিনিৰ মূল্য আনুমানিক বাৰ লাখ টকাৰো অধিক। আৰক্ষীয়ে ইতিমধ্যে মণিপুৰৰ আৰ কে ধানবীৰ নামৰ ট্ৰাকখনৰ চালক জনক আটক কৰি তদন্ত অব্যাহত ৰাখিছে।