বিশেষ বাৰ্তা, ১ নৱেম্বৰঃ ডিব্ৰুগড়ৰ বৰবৰুৱা থানাৰ অন্তৰ্গত বগীবিল আৰক্ষী চকীৰ ভাৰপ্ৰাপ্ত আৰক্ষী বিষয়া পাৰ্থপ্ৰতিম দত্তৰ নেতৃত্বত ৮ হাজাৰ লিটাৰ কন্ডেঞ্চাৰ তেলসহ এখন টেংকাৰ জব্দ কৰিবলৈ সক্ষম হয়।তথ্য অনুসৰি টহলদাৰী আৰক্ষীৰ এটা দলে বগীবিল দলঙৰ সমীপত আজি পুৱতি নিশা তহল দি থকা অৱস্থাত চোৰাং ভাৱে কঢ়িয়াই লৈ যোৱা কন্ডেঞ্চাৰ তেল ভৰ্তি এখন টেংকাৰ জব্দ কৰিবলৈ সক্ষম হয় আৰু লগতে চোৰাং তেলৰ বেহাৰ লগত জৰিত গাড়ী খনৰ চালক সহ চাৰি জনকৈ ব্যক্তিক আটক কৰে। 
উল্লেখযোগ্য যে আজি পুৱতিনিশা শিৱসাগৰ নাহৰণীৰ পৰা ধেমাজি অভিমুখে গৈ থকা AS-05B-6685 নম্বৰৰ টেংকাৰ খনত ৮ হাজাৰ লিটাৰ কন্ডেনচাৰ তেল চোৰাংভাৱে কঢ়িয়াই লৈ গৈছিল চালক সহ চাৰিজন ব্যক্তিয়ে। তেনেতে বগীবিল আৰক্ষী চকীৰ এটা দলে তহল দি থকা অৱস্থাত বগীবিল দলঙৰ সমীপত চোৰাংভাৱে তেল কঢ়িয়াই লৈ যোৱা গাড়ীখনক নিৰীক্ষণৰ বাবে ৰখাই ক’ন্ডেনচাৰ কঢ়িয়াই নিবৰ যাৱতীয় নথি-পত্ৰ বিচৰাত ব্যক্তিকেইজনে কোনো ধৰণৰ প্ৰমাণ পত্ৰ দেখুৱাব নোৱাৰিলে।অৱশেষত আৰক্ষীয়ে চোৰাং তেল কঢ়িয়াই নিয়া গাড়ীখনৰ লগতে দীপক চাংমাই আৰু তিলক দিহিঙীয়া আৰু গাড়ীখনৰ চালক ৰাজেন দিহিঙীয়া আৰু সহায়ক ভূৱন বৰাক গ্ৰেপ্তাৰ কৰি জেললৈ প্ৰেৰণ কৰা হয়। দীৰ্ঘসময়ৰ পৰা বগীবিল দলং বিভিন্ন চোৰাং কাৰবাৰৰ কৰিডৰ হৈ পৰিছে।
প্ৰেৰক বিভাস দুৱৰা