নিয়মীয়া বাৰ্তা, ৮জানুৱাৰী: ভাৰতীয় ক্রিকেট দলৰ তাৰকা উইকেটকীপাৰ–বেটাৰ ঋষভ পণ্টৰ আজি আঁঠুৰ সফল অস্ত্রোপচাৰ সম্পন্ন হয়৷ মুম্বাইৰ কোকিলাবেন ধীৰুভাই আম্বানি চিকিৎসালয়ত চিকিৎসাধীন হৈ থকা পণ্টৰ আজি তিনি ঘণ্টা ধৰি আঁঠুৰ অস্ত্রোপচাৰ কৰা হয়৷ ভাৰতীয় ক্রিকেট নিয়ন্ত্রণ ব’ডৰ এক বিবৃতিত আজি এই কথা সদৰী৷ ডাঃ দীনাশ পার্দিৱালা আৰু তেওঁৰ দলটোৱে পণ্টৰ আঁঠুৰ অস্ত্রোপচাৰ কৰে বুলি বিবৃতিটোত লগতে কোৱা হয়৷ পণ্টৰ সোঁ–আঁঠুৰ ফাটি যোৱা লিগামেণ্টৰ আজি সফলতাৰে অস্ত্রোপচাৰ সম্পন্ন হয়৷ বর্তমান ক্রিকেটাৰগৰাকী চিকিৎসকৰ পর্যবেক্ষণত আছে৷ ডাঃ পার্দিৱালা আৰু তেওঁৰ সহযোগী দলটোৰ পৰামর্শ অনুসৰি পণ্টৰ স্বাস্থ্য সন্দর্ভত পৰৱর্তী পদক্ষেপ লোৱা হ’ব বুলি ব’ডৰ সূত্রটোত লগতে সদৰী৷