বিশেষ বাৰ্তা, ১৩ ছেপ্টেম্বৰঃ চৰকাৰী কার্যালয়ৰ ‘আৱর্জনা’ বিক্রী কৰি প্রায় ৬০০ কোটি টকা উপার্জন কৰিছে কেন্দ্রৰ নৰেন্দ্র মোদী চৰকাৰে৷ পৰিত্যক্ত কাগজ–পত্র, ফাইল, পৰি থকা যান–বাহন ইত্যাদি এই বিক্রীৰ তালিকাত আছে৷ কিছুদিন পূর্বে ভাৰতে চন্দ্রলৈ মহাকাশযান প্রেৰণ কৰিছে৷ মহাকাশ গৱেষণা সংস্থা ইছৰোৱে সদৰী কৰা অনুসৰি এই যান প্রেৰণৰ নামত খৰচ হৈছে ৬০০ কোটি টকা৷ অর্থাৎ চন্দ্রযান–৩ অভিযানত খৰচ হোৱা ধনৰ সমপৰিমাণ টকা বাতিল হোৱা কাগজ–পত্র, গাড়ী–মটৰ বিক্রী কৰি উপার্জন কৰিছে কেন্দ্রীয় চৰকাৰে৷ যোৱা আগষ্ট মাহলৈ চৰকাৰে উপার্জন কৰিছে প্রায় ৬০০ কোটি টকা৷ আগন্তুক অক্টোবৰ মাহৰ ভিতৰত এনেধৰণৰ উপার্জনৰ পৰিমাণে এহেজাৰ কোটি টকা অতিক্রম কৰিব পাৰে বুলি ধাৰণা কৰা হৈছে৷ প্রশাসনিক দপ্তৰসমূহত চাফাই অভিযান আৰম্ভ কৰিছে কেন্দ্রীয় চৰকাৰে৷ আগন্তুক ২ অক্টোবৰৰ পৰা ৩১ অক্টোবৰলৈ পুনৰ এই অভিযান চলিব৷ ইয়াৰ মূল লক্ষ্য হৈছে পৰিচ্ছন্নতা৷ প্রশাসনত দীর্ঘদিন বন্ধ হৈ পৰি থকা কামৰ চাপ কমাবলৈও এই অভিযান আৰম্ভ কৰা হৈছে৷ বিগত বছৰৰ অক্টোবৰ মাহত অনুৰূপ অভিযান চলাইছিল কেন্দ্রীয় চৰকাৰে৷ যোৱা বছৰ বাতিল হোৱা কাগজ–পত্র, গাড়ী আদি বিক্রী কৰি ৩০০ কোটি টকা উপার্জন কৰিছিল চৰকাৰে৷ আগন্তুক অক্টোবৰত এনে অভিযানেৰে ৪০০ কোটি টকা উপার্জনৰ লক্ষ্য লোৱা হৈছে৷