শিক্ষা–পৰিষ্কাৰ–পৰিচ্ছন্নতাত গুৰুত্বৰ নির্দেশ

নিয়মীয়া বার্তা,১৮ ফেব্রুৱাৰীঃ নলবাৰী জিলাৰ ঘগ্রাপাৰ ৰাজহ চক্রৰ তথা বডিগোগ বনভাগ শিক্ষাখণ্ডৰ অন্তর্গত বৰাজোল, আল্লিয়া অঞ্চলৰ কেইবাখনো চৰকাৰী বিদ্যালয়ত আৰু অংগনৱাডী কেন্দ্রত সোমবাৰে পুৱা ৯ বজাতে জিলা উপায়ুক্ত ভাৰত ভূষণ দেৱ চৌধুৰী উপস্থিত হোৱাৰ লগে লগে বিদ্যালয়কেইখনত হুৱাদুৱা লগা পৰিলক্ষিত হয়৷ আল্লিয়া মাধাপুৰ প্রাথমিক বিদ্যালয়, আল্লিয়া বালিকা মধ্য ইংৰাজী বিদ্যালয়, বৰাজোল অঞ্চলৰ ২২১নং ভিঠা প্রাথমিক বিদ্যালয় আদিত উপস্থিত হৈ উপায়ুক্তগৰাকীয়ে বিদ্যালয়কেইখনৰ শৌচাগাৰ, প্রস্রাৱাগাৰৰ অনাময় ব্যৱস্থাসমূহ পৰিদর্শন কৰে৷ ল’ৰা–ছোৱালীৰ বাবে সুকীয়া সুকীয়াকৈ শৌচাগাৰ–প্রস্রাৱাগা আছে নে নাই আৰু শৌচাগাৰ–প্রস্রাৱাগা আদি পৰিষ্কাৰ–পৰিচ্ছন্ন হৈ আছে নে নাই আদি পৰিদর্শন কৰি বিদ্যালয়সমূহৰ শিক্ষক–শিক্ষয়িত্রীস এইক্ষেত্রত বিশেষ গুৰুত্ব দিবলৈ নির্দেশ দিয়ে৷ আল্লিয়া বালিকা মধ্য ইংৰাজী বিদ্যালয়ৰ শৌচাগাৰ–প্রস্রাৱাগা আদি পৰিদর্শন কৰি উপায়ুক্তগৰাকীয়ে এই বিদ্যালয়ৰ শিক্ষক–শিক্ষয়িত্রীস লগত পৰিষ্কাৰ–পৰিচ্ছন্ন সন্দর্ভত আলোচনা কৰি প্রতিদিনে চাফ–চিকুণ কৰি ৰাখিবলৈ নির্দেশ দিয়ে৷ আনহাতে, বিদ্যালয়সমূহৰ পৰিচালনা সমিতিসমূহেও যাতে নিজৰ নিজৰ বিদ্যালয়সমূহৰ অন্যান্য দিশৰ লগতে পৰিষ্কাৰ–পৰিচ্ছন্ন দিশতো সমানে গুৰুত্ব দিয়ে, তাৰ প্রতি আহ্বান জনায়৷ উপায়ুক্তগৰাকীয়ে পৰিষ্কাৰ–পৰিচ্ছন্ন অটুট নাৰাখিলে ছাত্র–ছাত্রীসকল বিভিন্ন বেমাৰত ভুগি শাৰীৰিক আৰু আর্থিকভাৱে ক্ষতিগ্রস্ত হ’বলগীয়া যে হয়, তাকো সোঁৱৰাই দিয়ে৷ যাৰ বাবে পৰিষ্কাৰ–পৰিচ্ছন্ন অটুট ৰাখি সুস্থ–সবল জীৱন–যাপন কৰাৰ বাবে প্রধানমন্ত্রী নৰেন্দ্র মোদীয়ে ‘স্বচ্ছ ভাৰত অভিযান’ নামেৰে এখন গুৰুত্বপূর্ণ আঁচনি প্রৱর্তন কৰিছে৷ সুস্থ–সবল জীৱন যাপন কৰিব পাৰিলেহে দেশৰ জনসাধাৰণে উন্নতিত অৰিহণা যোগাব পাৰিব৷ যিহেতু ছাত্র–ছাত্রীসকল দেশৰ ধৰণীস্বৰূপ আৰু দেশৰ ভৱিষ্যতৰ নাগৰিক৷ স্কুলীয়া দিনৰ পৰাই ছাত্র–ছাত্রীসকলক সকলো ফালৰ পৰাই সজাগ কৰি তুলিব লাগিব বুলিও উপায়ুক্তগৰাকীয়ে শিক্ষক–শিক্ষয়িত্রীৰ লগতে পৰিচালনা সমিতিসমূহৰ বিষয়ববীয়াসকলৰ লগত মত বিনিময় কৰে৷ আনহাতে, পাঠদানৰ সময়ত কোনো কাৰণতে ম’বাইল ফোন ব্যৱহাৰ নকৰিবলৈ শিক্ষক–শিক্ষয়িত্রীস উপায়ুক্তগৰাকীয়ে আহ্বান জনায়৷ ইপিনে, উপায়ুক্ত ভাৰত ভূষণ দেৱ চৌধুৰীয়ে ভিঠা প্রাথমিক বিদ্যালয়ৰ ছাত্র–ছাত্রীৰ লগত শৰীৰচর্চাতো ভাগ লৈ সুস্থ–সবল জীৱন ৰক্ষা কৰিবলৈ ছাত্র–ছাত্রীৰ প্রতি আহ্বান জনায়৷ তদুপৰি উপায়ুক্তগৰাকীয়ে কেইবাটাও অংগনৱাডী কেন্দ্র পৰিদর্শন কৰি অংগনৱাডী কর্মী–সহায়িকাক চাফ–চিকুণ অটুট ৰাখি শিশুসকলক খাদ্য যোগান ধৰিবলৈ পৰামর্শ দিয়ে৷ জিলা উপায়ুক্তগৰাকীয়ে এনেদৰে হঠাতে বিদ্যালয়সমূহ পৰিদর্শন কৰাত বৃহত্তৰ বৰাজোল আৰু আল্লিয়া অঞ্চলৰ সচেতন ৰাইজে আদৰণি জনাইছে৷