বাৰ্তা বুৰো, ১২ অক্টোবৰ : ঐতিহাসিক মৰিগাঁও স্কুল খেলপথাৰত আজি দিনৰ ১১ বজাত সদৌ অসম ছাত্ৰ সন্থাৰ অষ্টাদশ মৰিগাঁও অধিৱেশনৰ লাইখুঁটা স্থাপন কৰা হয়। আছুৰ ভাৰপ্ৰাপ্ত সভাপতি তথা আদৰণী সমিতিৰ সম্পাদক উৎপল শৰ্মাই আঁত ধৰা গাম্ভীৰ্যপূৰ্ণ অনুষ্ঠানটিত উপস্থিত থাকি আছুৰ কেইবাগৰাকী কেন্দ্ৰীয় নেতা, কেইবাখনো জিলাৰ আছু নেতৃত্ব, মৰিগাঁও জিলাৰ বৰ্তমানৰ আছু নেতা-কৰ্মী আৰু প্ৰাক্তন আছু নেতা আৰু মৰিগাঁওবাসী ৰাইজৰ উপস্থিতিত গায়ন-বায়নৰ মংগল ধ্বনিৰ মাজত লাইখুঁটা স্থাপন কৰে মৰিগাঁও জিলা আছুৰ প্ৰতিষ্ঠাপক সভাপতি উপেন্দ্ৰ নাথ শৰ্মাই। আজিৰ অনুষ্ঠানত বিশিষ্ট অতিথি ৰূপে উপস্থিত থাকে মৰিগাঁও জিলা আয়ুক্ত দেৱাশিস শৰ্মা আৰু আৰক্ষী অধীক্ষক হেমন্ত কুমাৰ দাস। আনহাতে, আজিৰ এই অনুষ্ঠানত মৰিগাঁওবাসী ৰাইজৰ সহযোগৰ বাবে ধন্যবাদ জ্ঞাপন কৰিছে মৰিগাঁও জিলা আছুৰ সভাপতি দিপুল কুমাৰ নাথ, সম্পাদক ৰূপজ্যোতি মেধি আৰু আদৰণী সমিতিৰ সভাপতি তথা বিশিষ্ট সাহিত্যিক মিলেশ্বৰ পাতৰ আৰু কাৰ্যকৰী সভাপতি অতনু শৰ্মাই।
প্ৰেৰক প্ৰাঞ্জল দাস