নিয়মীয়া বাৰ্তা, ৭ নৱেম্বৰ : নগাঁও জিলাৰ খাটোৱাল থানাৰ অন্তৰ্গত কুটাইয়নিৰ নিৱাসী তথা বঢ়মপুৰস্থিত নৱম অসম সশস্ত্ৰ আৰক্ষী বাহিনীৰ এজন জোৱান মিজোৰাম- ম্যানমাৰ সীমান্তৰ পৰা নিৰুদ্দেশ হোৱা ঘটনাই কুটাইয়নিৰ লগতে চামগুৰিত তীব্ৰ চাঞ্চল্যৰ সৃষ্টি হৈছে ৷ জানিব পৰা মতে খাটোৱাল আৰক্ষী থানাৰ অন্তৰ্গত কুটাইয়নি অঞ্চলৰ নিবাসী বগাই নাথৰ পুত্ৰ চবিন নাথ নামৰ যুৱক জন বঢ়মপুৰস্থিত নৱম অসম সশস্ত্ৰ আৰক্ষী বাহিনীৰ জোৱান আছিল ৷ মিজোৰামত অনুষ্ঠিত নিৰ্বাচনৰ বাবে বঢ়মপুৰস্থিত নৱম অসম সশস্ত্ৰ আৰক্ষী বাহিনীৰ এটা দলক যোৱা ২৮ অক্টোবৰত মিজোৰামলৈ প্ৰেৰন কৰিছিল ৷ উক্ত দলটোত চামগুৰিৰ খাটোৱাল থানাৰ অন্তৰ্গত কুটাইয়নি অঞ্চলৰ চবিন নাথ নামৰ জোৱান জনো আছিল ৷ মিজোৰাম-ম্যানমাৰ সীমান্তত নিৰ্বাচনত নিয়োজিত চবিন নাথ নামৰ জোৱানজন যোৱা ৫ নৱেম্বৰৰ পুৱা ছয় বজাৰ পৰা কৰ্মৰত অৱস্থাত নিৰুদ্দেশ হয় ৷ জোৱানজন নিৰুদ্দেশ হোৱাৰ সন্দৰ্ভত মিজোৰাম আৰক্ষীৰ লগতে বঢ়মপুৰস্থিত নৱম অসম সশস্ত্ৰ আৰক্ষী বাহিনী তথা আৰক্ষী বিভাগে তদন্ত অব্যাহত ৰাখিছে যদিও বাতৰি লিখা সময়লৈকে জোৱানজনৰ সন্ধান পোৱা নাই বুলি পৰিয়ালৰ লোকে জানিবলৈ দিয়ে ৷ দুটি সন্তানৰ পিতৃ চবিন নাথ মিজোৰামৰ পৰা নিৰুদ্দেশ হোৱাৰ পিছত জোৱানজনৰ পত্নী আৰু পৰিয়ালৰ লোকে নগাঁও জিলা আৰক্ষী অধীক্ষকৰ লগতে আৰক্ষী সঞ্চালকপ্ৰধানক জোৱান জনক উদ্ধাৰ কৰিবলৈ ব্যৱস্থা গ্ৰহণ কৰিবলৈ অনুৰোধ জনাইছে ৷
প্ৰেৰক প্ৰমোদ কুমাৰ শৰ্মা