হতাশা আমাৰ পৰম শত্ৰু, আশা আমাৰ পৰম বন্ধু- ড০ শৰ্মা

বিশেষ বাৰ্তা,  ১৭ ডিচেম্বৰ : ছাত্ৰ-ছাত্ৰীসকলে দায়িত্ববোধৰে অধ্যয়নত ব্ৰতী হৈ জীৱনটো গঢ় দিব লাগিব ৷ হতাশাক কেতিয়াও প্ৰশ্ৰয় দিব নালাগে ৷ কিয়নো হতাশা আমাৰ শত্ৰু আৰু আশা আমাৰ পৰম বন্ধু ৷ আশাতীতভাৱে আমি শিক্ষা জীৱনটো সদায় আগুৱাই নিব লাগিব ৷ যাতে কোনো কাৰণতে লক্ষ্যভ্ৰষ্ট বা পথচ্যুত নহয় ৷- এই মন্তব্য ৰাজ্যৰ মুখ্যমন্ত্ৰী ড° হিমন্ত বিশ্ব শৰ্মাৰ ৷ আজি জালুকবাৰী সমষ্টিৰ বংশৰ মিনি ষ্টেডিয়ামত দিনৰ ১২ বজাত কৃতী ছাত্ৰ-ছাত্ৰীক সম্বৰ্ধনা জনোৱাৰ লগতে বংশৰ ষ্টেডিয়ামৰ আধাৰশিলা স্হাপন কাৰ্যসূচীত ভাগ লৈ তেওঁ কয় যে জালুকবাৰী সমষ্টিৰ পৰা বিধায়ক হিচাপে নিৰ্বাচিত হোৱাৰ পিছত ২০০২ চনৰ পৰা বিগত বিশ বছৰে (ক’ভিডৰ সময়ত এবাৰ পৰীক্ষা অনুষ্ঠিত হোৱা নাছিল) নিৰৱছিন্নভাৱে সমষ্টিটোৰ বিধায়ক হিচাপে হাইস্কুল শিক্ষান্ত পৰীক্ষা আৰু উচ্চতৰ মাধ্যমিক চূড়ান্ত পৰীক্ষাত প্ৰথম বিভাগত উত্তীৰ্ণ ছাত্ৰ-ছাত্ৰীসকলক সম্বৰ্ধনা জনাই অহা হৈছে ৷ তেওঁ পুনৰ কয় যে প্ৰথম বছৰত মাত্ৰ ২৮৮গৰাকী আছিল ৷ এইবাৰ কুৰি সংখ্যক বৰ্ষত মুঠ ১৯৮৬গৰাকী ছাত্ৰ-ছাত্ৰীক সম্বৰ্ধনা জনোৱাৰ ব্যৱস্থা কৰা হৈছে ৷ ইয়াৰে হাইস্কুল শিক্ষান্ত পৰীক্ষাত প্ৰথম বিভাগত উত্তীৰ্ণ ১১৫৬গৰাকী আৰু উচ্চতৰ মাধ্যমিকৰ ৮৩০গৰাকী ৷ মুখ্যমন্ত্ৰীগৰাকীয়ে কয় যে হাইস্কুল শিক্ষান্ত পৰীক্ষাত যিসকল ছাত্ৰ-ছাত্ৰীয়ে প্ৰথম বিভাগ বা ষ্টাৰ, ডিষ্টিংচন মাৰ্ক লাভ কৰে, উচ্চতৰ মাধ্যমিকৰ চূড়ান্ত পৰীক্ষাত ইয়াৰ সৰহসংখ্যকে এই ধাৰাবাহিকতা অক্ষুণ্ণ ৰাখিব নোৱাৰে ৷ যাৰ ফলত সৰহসংখ্যক ছাত্ৰ-ছাত্ৰী লক্ষ্যভ্ৰষ্ট হয় ৷ ইয়াৰ কাৰণ হিচাপে মুখ্যমন্ত্ৰীগৰাকীয়ে কয় যে হাইস্কুল শিক্ষান্ত পৰীক্ষালৈকে ছাত্ৰ বা ছাত্ৰীগৰাকী অভিভাৱকৰ সম্পূৰ্ণ দায়িত্বত থাকে ৷ অভিভাৱকৰ তাগিদাত পঢ়া-শুনা সঠিকভাৱে কৰে ৷ অভিভাৱকসকলেও নিজৰ সন্তানৰ পঢ়া-শুনাৰ খবৰ শিক্ষকৰ পৰা ল’ব পাৰে ৷ কিন্তু  মহাবিদ্যালয়ত অধ্যয়ন কৰাৰ লগে লগে ছাত্ৰ-ছাত্ৰীসকলে অভিভাৱকক মিছা কথা ক’বলৈ আৰম্ভ কৰে ৷ ক্লাছ নকৰে ৷ সমনীয়াৰ লগত কলেজ চৌহদৰ ভিতৰে-বাহিৰে ফুৰি ফুৰে ৷ অধ্যাপক আৰু অভিভাৱকৰ মাজত দূৰত্ব বাঢ়ে ৷ যাৰ ফলত নিজৰ সন্তানৰ পঢ়া খবৰ লাভ নকৰে ৷ এইবোৰ কাৰণতে উচ্চতৰ মাধ্যমিকত ছাত্ৰ-ছাত্ৰীয়ে আশা কৰা মতে ফল লাভ কৰিব নোৱাৰে ৷ তেওঁ ছাত্ৰ-ছাত্ৰীসকলক অধিক দায়িত্ববোধ আৰু সচেতনভাৱে উচ্চ শিক্ষা গ্ৰহণত ব্ৰতী হ’বলৈ আহ্বান জনায়। কোনো কাৰণতে হতাশাক প্ৰশ্ৰয় নিদিবলৈ আহ্বান জনাই কয় যে বিজ্ঞানীসকলে হতাশ হ’লে আজিৰ পৃথিৱীখন আগবাঢ়ি নগ’লহেঁতেন ৷ ঠিক তেনেদৰে শচীন তেণ্ডুলকাৰে হতাশ হ’লে ক্ৰিকেট বন্ধ হ’লহেঁতেন আৰু দেশৰ প্ৰধানমন্ত্ৰী নৰেন্দ্ৰ মোদী হতাশ হোৱাহেঁতেন আজিৰ ডিজিটেল ইণ্ডিয়া ৰাইজে লাভ নকৰিলেহেঁতেন বুলি উল্লেখ কৰি তেওঁ কয় যে আজিৰ পৃথিৱীখন বহুদূৰ আগুৱাই গৈছে ৷ সংস্হাপনৰ বহুত বাট মুকলি হৈছে ৷ মাত্ৰ চকু আৰু কাণ সঠিকভাৱে ব্যৱহাৰ কৰি সেইবোৰ অধ্যয়ন কৰিলে নিজে নিজৰ সংস্হাপন বাট উলিয়াই ল’ব পাৰি ৷ ছাত্ৰ-ছাত্ৰীসকলে বৰ্তমানৰ যুগৰ লগত সমানে আগবাঢ়িব লাগিব ৷