নিয়মীয়া বাৰ্তা, ২১ জানুৱাৰীঃ অযোধ্যাৰ ৰাম মন্দিৰৰ প্ৰাণ প্ৰতিষ্ঠাৰ পূৰ্বে ধুবুৰী চহৰৰ বিভিন্ন অঞ্চল যেন মিনি অযোধ্যা সদৃশ ৰূপ লৈছে। চহৰখনৰ বিভিন্ন ৱাৰ্ডৰ ৰাজপথত হৈ পৰা দেখা গৈছে গেৰুৱাময়। চহৰখনৰ বিভিন্ন অঞ্চলৰ ৰাজ্যৰ দাঁতিক ৰাম মন্দিৰৰৰ সুবিশাল বেনাৰ, প্লে কাৰ্ড, পতাকা আৰু দৃষ্টিনন্দন আলোকসজ্জাৰে সুসজ্জিত কৰি তোলা দেখা গৈছে। জানিব পৰা মতে, চহৰখনৰ পাঁচমোৰ অঞ্চলত অহাকালিৰ অযোধ্যাৰ কাৰ্যসূচীৰ লাইভ দেখুৱাবলৈ বিশাল স্ক্ৰীন লগোৱাৰ পৰিকল্পনা কৰা হৈছে। আনহাতে ৰাম মন্দিৰৰ প্ৰাণ প্ৰতিষ্ঠাৰ সৈতে সংগতি ৰাখি চহৰখনৰ ১নং ৱাৰ্ডস্থিত সন্তোষী মা মন্দিৰৰ কৰ্তৃপক্ষৰ দ্বাৰা আজি বিয়লিৰ পৰা দুই দিনীয়া এক বিশেষ কাৰ্যসূচী হাতত লোৱা হৈছে। ঠিক অনুৰূপে ধুবুৰীৰ ঐতিহ্যমণ্ডিত কালীবাৰী প্ৰাংগণতো অহাকালি আয়োজন কৰা হৈছে আঢ়ম্বৰপূৰ্ণ কাৰ্যসূচীৰ। চহৰখনৰ ১নং ৱাৰ্ডৰ ৰাম মন্দিৰত কাইলৈ এক বিশেষ কাৰ্যসূচী হাতত লোৱা হোৱা বুলি মন্দিৰ কৰ্তৃপক্ষই জনাইছে। আনহাতে চহৰখনৰ এন এচ ৰোড, পালপাৰা, বালুৰচৰ, নুনীয়াপট্টী, শান্তিনগৰকে ধৰি অইন অইন অঞ্চলতো অহাকালিৰ ৰাম মন্দিৰৰ প্ৰাণ প্ৰতিষ্ঠা উপলক্ষে বিভিন্ন কাৰ্যসূচী হাতত লোৱা হোৱা বুলি প্ৰকাশ। দৰাচলতে, এক কথাত ক’বলৈ গ’লে ৰাম মন্দিৰৰ প্ৰাণ প্ৰতিষ্ঠাৰ প্ৰাকক্ষণত এতিয়াৰ পৰাই ধুবুৰী চহৰত সৃষ্টি হৈছে উৎসবমুখৰ পৰিবেশৰ।
প্ৰেৰক অমিতাভ চক্ৰৱৰ্তী