নিয়মীয়া বাৰ্তা, ১৫ ফেব্ৰুৱাৰীঃ বাগদেৱী সৰস্বতী পূজাৰ উখলমাখল পৰিৱেশৰ মাজতে কালি মিছামাৰী অঞ্চলৰ এগৰাকী পুৰোহিতৰ আকস্মিক মৃত্যুৰ ঘটনাই সমগ্ৰ অঞ্চলটোত শোকৰ ছাঁ বিস্তাৰ কৰিছে৷ অঞ্চলটোৰ পাতিদৈ ভেৰেলা গাঁও নিৱাসী তথা গৰুবন্ধাস্থিত হনুমান মন্দিৰৰ স্থায়ী পূজাৰী মুকেশ মিশ্ৰ (৪৬) কালি ভাৰতীয় সেনাৰ গাড়ীৰ খুন্দাত গুৰুত্বৰভাৱে জখম হোৱাৰ পাছত সেনা জোৱানসকলে চিকিৎসালয়লৈ নিয়াৰ যো-জা কৰি থাকোঁতে পুৰোহিত জনৰ মৃত্যু হোৱা বুলি জানিবলৈ দিছে ৷ প্ৰাপ্ত খৱৰ মতে পূজাৰী মুকেশ মিশ্ৰ ভাৰতীয় সেনাৰ মিছামাৰী সামৰিক ছাউনীৰ বায়ু সেনা বিভাগৰ কাষৰ এটা মন্দিৰত আন দিনাৰ দৰে কালিও পূজাভাগ কৰি আবেলি পাঁচ মান বজাত বায়ু সেনা বিভাগৰ মাজেৰে যোৱা পথৰ ওপৰেদি নিজৰ চাইকেলত উঠি গৃহ অভিমুখে গৈ থকা পৰত পুৰোহিত জনৰ পিছে পিছে গৈ থকা ভাৰতীয় সেনাৰ এখন গাড়ী পদপথৰ ওপৰতে পিছ পিনৰ পৰা প্ৰচণ্ড খুন্দা মৰাৰ ফলত পুৰোহিত গৰাকী চাইকেল সহ ঠাইতে ঢলি পৰে৷ সেনাৰ গাড়ীৰ খুন্দাত গুৰুত্বৰ ভাৱে আহত পুৰোহিত জনক সেনাজোৱান সকলে ততাতৈয়াকৈ চিকিৎসালয়লৈ নিয়াৰ যো-জা কৰাৰ সময়তে পুৰোহিত মুকেশ মিশ্ৰই শেষ নিশ্বাস ত্যাগ কৰে বুলি জানিবলৈ দিছে ৷ মৃত্যুৰ সময়ত পুৰোহিত মুকেশ মিশ্ৰ পত্নী, মাতৃ আৰু এজনকৈ ভাতৃ-ভগ্নী সহ অগণন গুণমুগ্ধক ইহসংসাৰত এৰি যায়৷
প্ৰেৰক বগা তপ্ন