নিয়মীয়া বাৰ্তা, ১৬ ফেব্ৰুৱাৰী : আজি কাহিলি পুৱাতেই পূব গোৱালপাৰাৰ মাটিয়া আৰক্ষী থানাৰ অন্তৰ্গত গাৰোমাৰীত এক ভয়ানক দুৰ্ঘটনা সংঘটিত হয় | মাছভৰ্তি এখন বলেৰ’ পিকআপৰ খুন্দাত এটা পৰিয়ালৰ ঘৰৰ দেৱাল ভাঙি ইটা খহি পৰে আৰু বিছনাত শুই থকা অৱস্থাতে পৰিয়ালটোৰ শিশুসহ তিনিজনকৈ লোক গুৰুতৰভাৱে আহত হয় | মাছভৰ্তি বলেৰ’ পিকআপখন শুকুৰবাৰৰ দোকমোকালিতে বৰপেটাৰ পৰা শিমলীতোলা টোপলাখোৱা অভিমুখে গৈ থাকোঁতে গাৰোমাৰীত দুখন ট্ৰেক্টৰৰে মুখামুখি হৈ ছাইড দিব খোজোঁতেই নিয়ন্ত্ৰণ হেৰুৱাই মাছভৰ্তি বাহনখনে খুন্দা মাৰে এটা পৰিয়ালৰ ঘৰৰ পকী দেৱালত | মুহূৰ্ততে দেৱালৰ ইটাবোৰ খুলি পৰে আৰু ঘৰৰ ভিতৰত বিছনাত শুই থকা দুটি শিশুক হেঁচি ধৰে। পৰিয়ালটোৰ মুৰব্বীজনৰ বুকুতো দুটামান ইটাৰ টুকুৰা পৰা বুলিও জানিব পৰা গৈছে | হাহাকাৰ লাগে পৰিয়ালটোত। এই ঘটনাত গাঁওখনত সকলোৰে মাজত চাঞ্চল্য বিয়পে আৰু ঘটনাস্থলীত বহু লোকৰ সমাগম ঘটে | আহতসকলক উদ্ধাৰ কৰাৰ উপৰি বহুতেই আকৌ অ’ত-ত’ত সিঁচৰতি হৈ পৰা মাছবোৰ বুটলিবলৈ ব্যস্ত হৈ পৰে | দুৰ্ঘটনাত পতিত মাছভৰ্তি বলেৰ’ বাহনখনৰ নম্বৰ এ এছ-১৫ চি-৮৭৬৫। কিছুপৰৰ পাছতেই ঘটনাস্থলীত মাটিয়া আৰক্ষীৰ এটা দল উপস্থিত হৈ ঘটনাৰ তদন্ত আৰম্ভ কৰে আৰু আহতসকলক চিকিৎসালয়লৈ নিয়াৰ দিহা কৰে। ঘটনাটোক কেন্দ্ৰ কৰি চাঞ্চল্য বিয়পে অঞ্চলজুৰি |
প্ৰেৰক সঞ্জীৱ কুমাৰ দাস