নিয়মীয়া বাৰ্তা ডিজিটেল, ১৬ ফেব্ৰুৱাৰীঃ অসম আৰক্ষীৰ মুখ্য কার্যালয়ত আজি অসম আৰক্ষী স্প’টছ মীটৰ থীম ছংটো মুকলি কৰা হয়৷ অসম আৰক্ষীয়ে আজি এক বিবৃতিযোগে এই কথা সদৰি কৰিছে৷ থীম ছঙৰ উদ্বোধনী অনুষ্ঠানত আৰক্ষী সঞ্চায়কপ্রধান জি পি সিং (আইপিএছ), বিশেষ আৰক্ষী সঞ্চালকপ্রধান হৰমিৎ সিং (আইপিএছ) আৰু অসম আৰক্ষীৰ আন জ্যেষ্ঠ বিষয়ববীয়া উপস্থিত থাকে৷ প্রায় এটা দশকৰ পিছত অসম আৰক্ষী স্প’টছ মীটৰ উদ্বোধনী সংস্কৰণৰ থীম ছঙটো মুকলি কৰা হৈছে৷ ৰাজ্যৰ ছয়টা বিভিন্ন প্রান্তত ১৯-২১ ফেব্রুৱাৰীলৈ প্রতিযোগিতাখন অনুষ্ঠিত হ’ব৷ ক্রীড়া মনোভাবৰ প্রতীক হোৱাৰ লক্ষ্যৰ এই থীম ছঙটোত কণ্ঠদান কৰিছে অসমৰ জনপ্রিয় গায়ক জুবিন গার্গ আৰু জুবলী বৰুৱাই৷ গীতৰ কথা পার্থসাৰথি মহন্তৰ আৰু সুৰ আৰোপ কৰিছে জুবলী বৰুৱাই৷ খেলুৱৈসকলক উৎসাহ আৰু উদ্দীপনা যোগোৱাৰ উদ্দেশ্যে সৃষ্টি কৰা এই থীম ছঙটোৱে খেলুৱৈসকলক তেওঁলোকৰ লক্ষ্যত উপনীত হোৱাত অনুপ্রাণিত কৰিব৷