নিয়মীয়া বাৰ্তা, ৩০ মে’ : বজালী জিলাৰ অন্তৰ্গত ঘটবৰ সাদেৰী নপাৰা চুবা নিৱাসী বন বিষয়া প্ৰয়াত প্ৰমোদ তালুকদাৰৰ জ্যেষ্ঠ পুত্ৰ তথা পাঠশালাৰ আনন্দৰাম বৰুৱা একাডেমিৰ বিদ্যালয় শাখাৰ সহকাৰী শিক্ষক জয়ন্ত তালুকদাৰৰ যোৱানিশা প্ৰায় ১০.৩০ বজাত চেন্নাইস্থিত এপলো হাস্পতালত প্ৰায় ৪৩ বছৰ বয়সত অকাল বিয়োগৰ খবৰে সমগ্ৰ অঞ্চলটোতে শোকৰ ছাঁ পেলাইছে৷ উল্লেখযোগ্যযে বিগত এবছৰৰ পৰা লিভাৰ ছিৰচিচ ৰোগত আক্ৰান্ত হৈ থকা জয়ন্ত তালুকদাৰে গুৱাহাটীৰ লগতে চেন্নাইস্থিত এপ’লো হস্পিতালত বিগত সময়চোৱাত চিকিৎসাধীন অৱস্থাত থকাৰ পিছত কিছু আৰোগ্য লাভ কৰিছিল যদিও পুনৰ শাৰিৰীকভাৱে অসুস্থ হৈ পৰাত পৰিয়ালৰ লোকে দহ দিন পূৰ্বে চেন্নাইস্থিত এপ’লো হস্পিতালত ভৰ্তি কৰে যদিও চিকিৎসাধীন অৱস্থাতে তালুকদাৰে যোৱা নিশা মৃত্যুক সাৱটি লবলগীয়া হয়৷ উল্লেখযোগ্যযে পাঠশালাস্থিত আনন্দৰাম বৰুৱা একাডেমিৰ বিদ্যালয় শাখাত দীৰ্ঘদিন ধৰি শিক্ষকতা কৰি অহা তালুকদাৰে শাৰিৰীক অসুস্থতা হেতু বিদ্যালয়ত পাঠদানৰ পৰা প্ৰায় এবছৰ ধৰি অনুপস্থিত হৈ আছিল৷ এগৰাকী ভাল শিক্ষক হিচাপে পৰিচিতি লাভ কৰা তালুকদাৰে মৃত্যুৰ সময়ত মাতৃ, পত্নী আৰু এগৰাকী কণমানি সন্তানৰ লগতে অনেক গুণমুগ্ধক ইহসংসাৰত এৰি থৈ যায়৷ অকাল বিয়োগ ঘটা শিক্ষক জয়ন্ত তালুকদাৰৰ মৃত্যুত আনন্দৰাম বৰুৱা একাডেমিৰ ৰেক্টৰ তথা অধ্যক্ষ ড০ ৰণজিৎ ডেকা, ছিনিয়ৰ ছেকেণ্ডাৰী স্কুলৰ অধ্যক্ষ নন্দিতা বৰ্মণ ডেকাৰ লগতে শিক্ষানুষ্ঠানখনৰ শিক্ষক শিক্ষয়িত্ৰীসকল, ঘটবৰ সাদেৰী গঞা ৰাইজৰ লগতে বিভিন্নজনে গভীৰ শোক প্ৰকাশ কৰাৰ লগতে শোকসন্তপ্ত পৰিয়ালবৰ্গলৈ গভীৰ সমবেদনা জ্ঞাপন কৰে৷ আনহাতে তালুকদাৰৰ মৃত্যুত আজি শিক্ষানুষ্ঠানখনৰ দুয়োটা চৌহদতে শোক সভা অনুষ্ঠিত কৰি এক মিনিট মৌন প্ৰাৰ্থনাৰে বিদেহ আত্মাৰ চিৰশান্তি কামনা কৰে৷
প্ৰেৰক কল্যাণ কলিতা