নিয়মীয়া বাৰ্তা ডিজিটেল, ২৭ জুনঃ প্রেম, ভালপোৱাৰ বাবে মানুহে কি কৰিব নোৱাৰে মাতৃক দেখা কৰিবলৈ ১৬খন দেশ গাড়ী চলাই আহি মহাৰাষ্ট্রত হাজিৰ পুত্র৷ প্রতিকূল প্রাকৃতিক প্রত্যাহ্বান গ্রহণ কৰি গাড়ী চলালে ১৮,৩০০ কিলোমিটাৰ৷ লণ্ডনৰ পৰা মহাৰাষ্ট্রৰ থানেলৈকে এই যাত্রাকালত যুৱকজনে বহু প্রতিকূল পৰিস্থিতিৰ সন্মুখীন হ’বলগীয়া হয় যদিও কোনো কাৰণতে তেওঁ হাৰ নামানিলে৷ লণ্ডন নিৱাসী ভাৰতীয় বংশোদ্ভৱ বীৰজিৎ মুংগালৰ মাতৃ থাকে মহাৰাষ্ট্রৰ থানেত৷ শেহতীয়াকৈ দুটা সংকল্প গ্রহণ কৰে এডভেঞ্চাৰ প্রিয় বীৰজিতে৷ মাতৃক দেখা কৰাৰ লগতে বিখ্যাত ছিল্ক ৰুটেৰে গাড়ী চলোৱাৰ হেঁপাহ পূৰণ কৰিব৷ এই হেঁপাহৰ বাবে যাত্রা আৰম্ভ কৰে বীৰজিতে৷ লণ্ডনৰ পৰা থানেলৈ ১৮,৩০০ কিলোমিটাৰ পথ গাড়ী চলাবলগীয়া হ’ল যুৱকজনে৷ এই যাত্রাত ব্রিটেইন, ফ্রান্স, জার্মানী, বেলজিয়াম, পোলেণ্ড, লিথুৱানিয়া, লাটভিয়া, ইষ্টোনিয়া, ৰাছিয়া, উজবেকিস্তান, কির্গিজস্তান, চীন, তিব্বত, নেপাল, ভাৰতসহ মুঠ ১৬খন দেশ অতিক্রম কৰে বীৰজিতে৷ এই যাত্রাৰ বাবে অফিচৰ পৰা দুমাহ ছুটী লৈছিল ভাৰতীয় যুৱকজনে৷ এই যাত্রাত তেওঁৰ সংগী হয় ৰোছন শ্রেষ্ঠ নামৰ নেপালৰ বন্ধু এজন৷ নেপাললৈকে ৰোছনে বীৰজিতক সংগ দিয়ে যদিও বাকী পথ তেওঁ অকলেই সম্পূর্ণ কৰিবলগীয়া হয়৷ প্রতিদিনে ৪০০ৰ পৰা ৬০০ কিলোমিটাৰ গাড়ী চলাইছিল বীৰজিতে৷ কেতিয়াবা পৰিস্থিতি ভাল থাকিলে এহাজাৰ কিলোমিটাৰ পথো গাড়ী চলাইছে বীৰজিতে৷ এই যাত্রা আছিল অতি বিপদসংকুল৷ বৰফ, শীত তথা ভয়াৱহ প্রতিকূল পৰিস্থিতি আৰু দুর্গম পথে বাৰে বাৰে বাধাৰ সৃষ্টি কৰিছিল যদিও ঘৰত আহি মাতৃ স্নেহত সকলো কষ্ট মুহূর্ততে উপশম হোৱা যেন অনুভৱ কৰিছে বীৰজিতে৷ উল্লেখনীয় যে এখন এছইউভি গাড়ীৰে এই যাত্রা আৰম্ভ কৰিছিল বীৰজিতে৷