নিয়মীয়া বাৰ্তা ডিজিটেল, ২৩ অক্টোবৰঃ “তোষামোদেই কংগ্ৰেছৰ একমাত্ৰ ৰাজনৈতিক দর্শন, সেয়েহে বদৰুদ্দিন আজমলৰ নেতৃত্বাধীন এ আই ইউ ডি এফ দল কংগ্ৰেছৰ সদায় পৰিপূৰক। বিপদৰ সময়ত এই দলটোৱে কংগ্ৰেছক আৰম্ভণিৰে পৰা উদ্ধাৰ কৰি আহিছে। অর্থ্যাৎ এ আই ইউ ডি এফৰ ৰাজনীতি কংগ্ৰেছৰ বাবে মক্কধজ হিচাপে প্রমাণিত হৈ আহিছে। আগন্তুক উপ নির্বাচনত প্রার্থী নিদিয়াৰ বাবে সিদ্ধান্ত লোৱাৰ লগতে চামগুৰি কংগ্ৰেছ প্রার্থী ৰকিবুল হুছেইনৰ তনয় তাঞ্জিল হুছেইনক কোনো কাৰণতেই পৰাস্ত হ’বলৈ দিয়া নহব বুলি কৈ এ আই ইউ ডি এফ নেতৃত্বই আচলতে কংগ্ৰেছৰ সাম্প্রদায়িক চৰিত্ৰকে উদঙাই দিছে। ভোট বিচাৰি চামগুৰি জনসাধাৰণৰ কাষলৈ যোৱাৰ পূৰ্বেই কংগ্ৰেছ প্রার্থী গৰাকী বদৰুদ্দিন আজমলৰ দৰবাৰত কেইবাবাৰো উপস্থিত হোৱাৰ কথা এ আই ইউ ডি এফৰ মূৰব্বীজনে নিজেই সংবাদ মাধ্যমৰ আগত প্রকাশ কৰিছে। কংগ্ৰেছ দলে এই কথা খণ্ডন কৰা নাই। এ আই ইউ ডি এফৰ কংগ্ৰেছৰ প্ৰতি নিচর্ত সমর্থনকো কংগ্রেছ দলে আদৰণি জনোৱা দেখা গৈছে”- এই মন্তব্য ৰাজ্যিক বিজেপিৰ মুখপাত্র ৰঞ্জীব কুমাৰ শৰ্মাৰ। উল্লেখযোগ্য যে ২২ অক্টোবৰৰ নিশা প্ৰদেশ কংগ্ৰেছৰ সভাপতি ভূপেন বৰাই অসম সম্মিলিত মৰ্চাৰ মূৰব্বী পদৰ পৰা পদত্যাগ কৰাৰ লগতে বিহালী বিধানসভা সমষ্টিত চি পি আই এম এলৰ প্ৰাৰ্থীক সমর্থন নকৰাৰ সিদ্ধান্তৰ কথা সহযোগী দলসমূহক লিখিতভাবে জনাই দিছিল। এই কথাই কংগ্ৰেছৰ একনায়কত্ববাদী চৰিত্ৰক স্পষ্ট কৰে বুলি উল্লেখ কৰি ৰাজ্যিক বিজেপিৰ মুখপাত্ৰ ৰঞ্জীব কুমাৰ শৰ্মাই লগতে কয় – “নিজৰ ৰাজনৈতিক স্বার্থ সিদ্ধিৰ বাবেই কংগ্ৰেছ দলে নিজৰ ইচ্ছা অনুসৰি সহযোগী দলসমূহক ব্যৱহাৰ কৰি আহিছে। কংগ্ৰেছৰ কথাত উঠা-বহা কৰা ৰাজনৈতিক দলকহে দলটোৱে সদায় প্রাধান্য দিয়ে। চামগুৰিৰ নিৰ্বাচনত শক্তিশালী প্রতিদ্বন্দিতা আগবঢ়াবৰ বাবে কংগ্ৰেছে এ আই ইউ ডি এফৰ শৰণাপন্ন হৈছে। লগতে বামপন্থী দল আৰু ক্ষুদ্র ক্ষুদ্র আঞ্চলিক দলসমূহৰ অস্তিত্বক অস্বীকাৰ কৰি ৰাজনৈতিকভাৱে তেওঁলোকক অপ্রাসংগিক কৰাৰ এক গভীৰ ষড়যন্ত্ৰত লিপ্ত হৈছে। প্রদেশ কংগ্ৰেছৰ সভাপতিকে ধৰি অনান্য নেতাৰ বক্তব্যৰ পৰাই এই কথা স্পষ্ট হৈ পৰে।” এক কথাত ক’বলৈ হ’লে ধুবুৰীৰ সাংসদ ৰকিবুল হুছেইনৰ পুত্ৰক নবাব পাতিবৰ বাবেই কংগ্ৰেছ দলে নিজৰ সকলো মিত্র দলক ভৰিৰে গচকি এ আই ইউ ডি এফৰ শৰণাপন্ন হৈছে।