নিয়মীয়া বাৰ্তা ডিজিটেল, ৩১ অক্টোবৰঃ আইচিচি টেষ্ট ৰেংকিঙৰ বলিং শাখাৰ শীর্ষস্থান হেৰুৱালে টীম ইণ্ডিয়াৰ তাৰকা পেচবলাৰ যশপ্রীত বুমৰাহে৷ প্রকাশিত ৰেংকিঙৰ বলিং শাখাৰ তৃতীয় স্থানলৈ অৱনমিত হয় বুমৰাহ৷ নিউজিলেণ্ডৰ বিপক্ষে চলি থকা তিনিখনীয়া টেষ্ট মেচৰ শৃংখলাটোৰ পুনেত হৈ যোৱা দ্বিতীয়খন টেষ্টত মাত্র এটা উইকেট দখল কৰাৰ বাবে বুমৰাহে শীর্ষস্থানটো হেৰুৱাবলগীয়া হয়৷ বুমৰাহক আঁতৰাই দক্ষিণ আফ্রিকাৰ তাৰকা পেচবলাৰ কাগিছো ৰাবাডাই বলিং শাখাৰ শীর্ষস্থানটো দখল কৰে৷ বাংলাদেশৰ বিপক্ষে খেলা টেষ্ট শৃংখলাটোৰ প্রথমখন টেষ্টত দাঙি ধৰা চমকপ্রদ প্রদর্শনৰ সুবাদত ৰাবাডাই শীর্ষস্থানটো নিজৰ দখললৈ নিয়ে৷ এই শাখাত অষ্ট্রেলিয়াৰ পেচবলাৰ জ’ছ হেজলউডে দ্বিতীয়স্থানলৈ উন্নীত হয়৷ ইফালে দুটা স্থান পিছুৱাই ভাৰতৰ তাৰকা স্পিনাৰ ৰবিচন্দ্রন অশ্বিনে চতুর্থস্থানলৈ অৱনমিত হয়৷ আনহাতে বেটিং শাখাত স্থানৰ অৱনমন ঘটিছে টীম ইণ্ডিয়াৰ তাৰকা বেটাৰ বিৰাট কোহলিৰ৷ ৬টা স্থানৰ অৱনমন ঘটি কোহলিয়ে চতুর্দশ স্থানটো লাভ কৰিছে৷ পাঁচটা স্থান পিছুৱাই টীম ইণ্ডিয়াৰ তাৰকা উইকেটকীপাৰ–বেটাৰ ঋষভ পণ্টেও একাদশ স্থানলৈ অৱনমিত হয়৷ অৱশ্যে প্রতিভাৱান অ’পেনাৰ যশস্বী জয়ছোৱালে তৃতীয় স্থানলৈ উন্নীত হৈছে৷ ইফালে অলৰাউণ্ডাৰ শাখাত ভাৰতৰ ৰবীন্দ্র জাদেজা আৰু ৰবিচন্দ্রন অশ্বিনে ক্রমে প্রথম আৰু দ্বিতীয় স্থানটো অক্ষুণ্ণ ৰাখিছে৷