🔹 বৰপেটাৰ আব্দুল আলিমক আটক
নিয়মীয়া বাৰ্তা, ৪ নৱেম্বৰ : কাছাৰত ৭ কোটি টকাৰ য়াবা টেবলেটসহ হেৰ’ইন জব্দ কৰিবলৈ সক্ষম হৈছে আৰক্ষীয়ে। কাছাৰৰ আৰক্ষী অধীক্ষক নোমল মাহাত্তাই জনোৱা মতে, বিশ্বাসযোগ্য চোৰাংচোৱাৰ খবৰৰ ভিত্তিত কালি সন্ধিয়া কাছাৰ আৰক্ষীয়ে ধলাই থানাৰ অধীনস্থ লাইলাপুৰত নিচাজাতীয় সামগ্ৰী পৰিবহণৰ বিৰুদ্ধে বিশেষ অভিযান চলাই আইজলৰ পৰা অহা এখন ট্ৰাক জব্দ কৰে । বাহনখনত তালাচীৰ সময়ত আৰক্ষীৰ দলটোৱে প্ৰায় ৩৭৫ গ্ৰাম সন্দেহযুক্ত হেৰ’ইন থকা ৩০টা চাবোনৰ কেছ আৰু ২০ হাজাৰ য়াবা টেবলেট উদ্ধাৰ কৰে। বাহনখনত বিশেষভাৱে নিৰ্মিত গোপন চেম্বাৰত ৰখা হৈছিল নিচাজাতীয় সামগ্ৰীখিনি। তদুপৰি বৰপেটা জিলাৰ আব্দুল আলিম (২৭) নামৰ ব্যক্তিজনক আটক কৰা হয়। ক’লা বজাৰত এই নিচাজাতীয় সামগ্ৰীখিনিৰ দাম প্ৰায় ৭ কোটি টকা হ’ব। মিজোৰামৰ আইজলৰ পৰা কঢ়িয়াই অনা হৈছিল নিচাজাতীয় সামগ্ৰীখিনি ৷ ঘটনা সন্দৰ্ভত অধিক তদন্ত চলি থকা বুলি আৰক্ষী অধীক্ষকে উল্লেখ কৰে।
প্ৰেৰক গৌতম তালুকদাৰ