ছ’চিয়েল মিডিয়া-ত দেশবিৰোধী কণ্টেণ্টৰ বিৰুদ্ধে কঠোৰ কেন্দ্ৰ

দেশবিৰোধী ছ’চিয়েল মিডিয়া কণ্টেন্টৰ ওপৰত কেন্দ্ৰ চৰকাৰৰ কঠোৰ ব্যৱস্থা; বিশেষ দল গঠন আৰু নতুন নীতি প্রস্তুতৰ যো-জা

কেন্দ্ৰীয় চৰকাৰে এতিয়া সামাজিক মাধ্যমত দেশবিৰোধী ঘৃণা ছটিয়াই থকা লোকসকলৰ ওপৰত কাঢ়া পদক্ষেপ লোৱাৰ পথত আগবাঢ়িছে। দেশবিৰোধী ভিডিঅ’ বা পোষ্ট শ্বেয়াৰ কৰা ব্যক্তিসকলে এতিয়া সহজে ৰেহাই নাপাব বুলি চৰকাৰী সূত্ৰৰ মাধ্যমেৰে জানিবলৈ পোৱা গৈছে।

সূত্ৰ অনুসৰি, কেন্দ্ৰীয় গৃহ মন্ত্ৰালয়ে  নীতি প্ৰস্তুত কৰিছে, যাৰ অধীনত —

• সমাজ মাধ্যমত দেশৰ বিৰুদ্ধে কন্টেন্ট আপলোড কৰা ব্যক্তি বা হেণ্ডলসমূহ ব্লক কৰা হ’ব।

• তেওঁলোকৰ ওপৰত আইনী পদক্ষেপ গ্ৰহণ কৰা হ’ব।

বিশেষ নিৰীক্ষণ দল গঠন

এই উদ্দেশ্যে এটা বিশেষ সামাজিক মাধ্যম নিৰীক্ষণ দল গঠন কৰা হ’ব যিয়ে

• দেশবিৰোধী লোকসকলৰ ওপৰত সদায় নজৰ ৰাখিব,

• তেওঁলোকক চিনাক্ত কৰি কঠোৰ ব্যৱস্থা গ্ৰহণ কৰিব।

বিশেষকৈ খালিস্তানপন্থী আতংকবাদী গুৰপৎৱন্ত সিং পন্নু আৰু তেনে বহু লোক সমাজ মাধ্যমত সক্ৰিয় হৈ ঘৃণা ছটিয়াইছে, যাৰ ওপৰত নতুন নীতি আহিলে কাঢ়া নিয়ন্ত্ৰণ আৰোপ কৰিব পৰা যাব।

সামাজিক মাধ্যম কোম্পানীৰ সৈতে আলোচনা

কেন্দ্ৰীয় চৰকাৰে আমেৰিকাৰ চৰকাৰ আৰু ছচিয়েল মিডিয়া কোম্পানীসমূহৰ সৈতে আলোচনা চলাইছে। চৰকাৰৰ মত অনুসৰি —

• Facebook, YouTube, X, Instagram আদিয়ে নিজৰ পৰ্যায়ৰ পৰাও মনিটৰিং ব্যৱস্থা জাৰি কৰিব যাতে দেশবিৰোধী কন্টেন্ট আপলোড নহয়।

চতুৰ্ফালে সমন্বিত পদক্ষেপ

• CBI, NIA, ৰাজ্যিক আৰক্ষী আৰু অন্যান্য গোপন সংস্থা একেলগে সমাজ মাধ্যমত দেশবিৰোধী আচৰণৰ ওপৰত সমন্বিত ৰণনীতি প্রস্তুত কৰি আছে।

• এই নীতি শীঘ্ৰে কাৰ্যকৰী হ’ব বুলি অনুমান কৰা হৈছে।

অতীত ঘটনাৰ প্ৰেক্ষাপট

সম্প্ৰতি পেহেলগামত হোৱা সন্ত্রাসবাদী আক্ৰমণ আৰু “অপাৰেচন সিন্দূৰ”ৰ সময়ত সামাজিক মাধ্যমত বহু দেশবিৰোধী পোষ্ট ভাইৰেল হৈছিল। এনে কাণ্ডৰ পুনৰাবৃত্তি ৰোধ কৰিবলৈ নতুন এই ব্যৱস্থা গৃহীত হৈছে।

এই পদক্ষেপৰ উদ্দেশ্য হ’ল— সামাজিক মাধ্যমত ঘৃণা, বিভাজনমূলক কন্টেন্ট আৰু দেশবিৰোধী চক্রান্তসমূহক আঁতৰোৱা আৰু সামাজিক শৃংখলা বজাই ৰখা।