৪৩নং তামুলপুৰ বিধানসভা সমষ্টিক কেন্দ্ৰ কৰি বৰ্তমান তীব্ৰ ৰাজনৈতিক তৎপৰতা দেখা গৈছে। আগন্তুক নিৰ্বাচনক লৈ সমষ্টিটোত প্ৰতিটো ৰাজনৈতিক দলেই নিজৰ নিজৰ শক্তি প্ৰদৰ্শনত ব্যস্ত হৈ পৰিছে। বিশেষকৈ এনডিএ সমৰ্থিত প্ৰাৰ্থী বিশ্বজিৎ দৈমাৰীৰ প্ৰচাৰ অভিযান তীব্ৰতৰ হৈ পৰাত সমষ্টিটোত নিৰ্বাচনী উত্তাপ দিনে দিনে বৃদ্ধি পাইছে। এনডিএৰ প্ৰাৰ্থীৰূপে ঘোষণাৰ পিছতেই বিশ্বজিৎ দৈমাৰীয়ে তামুলপুৰৰ বিভিন্ন অঞ্চলত ঘূৰি জনতাৰ সৈতে মত বিনিময় আৰম্ভ কৰিছে। বাগানপাৰাত অনুষ্ঠিত এক গুৰুত্বপূৰ্ণ বৈঠকত তেওঁ দলীয় কৰ্মী আৰু সংগঠনৰ সৈতে বিস্তৃত আলোচনা কৰে। এই বৈঠকত আগন্তুক নিৰ্বাচনৰ বাবে কৌশল নিৰ্ধাৰণ, বুথভিত্তিক সংগঠন শক্তিশালী কৰা আৰু জনসাধাৰণৰ সমস্যাসমূহ বুজ লোৱাৰ ওপৰত গুৰুত্ব আৰোপ কৰা হয়।
দলীয় কৰ্মীসকলক উদ্দেশ্য কৰি দৈমাৰীয়ে কয় যে ঐক্যবদ্ধ প্ৰচেষ্টা আৰু জনতাৰ আস্থা লাভ কৰাটোৱেই জয়ৰ মূল চাবিকাঠী। তেওঁ সকলোকে একেলগে কাম কৰিবলৈ আহ্বান জনায় আৰু নিৰ্বাচনী ক্ষেত্ৰত অধিক সক্ৰিয় হ’বলৈ অনুৰোধ কৰে। ইতিমধ্যে ৪৩নং তামুলপুৰ সমষ্টিক “হেভীৱেইট” সমষ্টিৰূপে চিহ্নিত কৰা হৈছে। ইয়াৰ মূল কাৰণ হৈছে এই সমষ্টিত দুজন প্ৰভাৱশালী নেতা ক্ৰমে এনডিএৰ বিশ্বজিৎ দৈমাৰী আৰু ইউপিপিএলৰ সভাপতি প্ৰমোদ বড়োৱে প্ৰাৰ্থিত্ব আগবঢ়াইছে। দুয়োগৰাকী প্ৰাৰ্থীয়ে নিজৰ নিজৰ সমৰ্থনভিত্তি শক্তিশালী কৰি তুলিবলৈ তীব্ৰ প্ৰচাৰ অভিযান চলাই আছে, যাৰ ফলত সমষ্টিটোৰ নিৰ্বাচনী যুঁজখন অধিক আকৰ্ষণীয় হৈ পৰিছে।
ইফালে, বিশ্বজিৎ দৈমাৰীক এনডিএৰ প্ৰাৰ্থীৰূপে ঘোষণা কৰাৰ পিছতেই বিপিএফৰ কিছু কৰ্মীৰ মাজত অসন্তোষ দেখা গৈছিল। কিছুমান ঠাইত বিৰোধো পৰিলক্ষিত হৈছিল। অৱশ্যে, শেহতীয়াকৈ বিপিএফ নেতা ইমানুৱেল মুছাহাৰীয়ে বিশ্বজিৎ দৈমাৰীৰ সমৰ্থনত প্ৰচাৰত অংশ ল’ব বুলি কৰা মন্তব্যই ৰাজনৈতিক মহলত নতুন আলোচনা সূচনা কৰিছে।এই বিষয়ে মন্তব্য কৰি বিশ্বজিৎ দৈমাৰীয়ে কয় যে সকলো দলীয় নেতা-কৰ্মীয়ে একেলগে কাম কৰিলে জয় নিশ্চিত। তেওঁ লগতে কয় যে তামুলপুৰ সমষ্টিত বিজেপি আৰু এনডিএৰ সংগঠন যথেষ্ট শক্তিশালী আৰু জনতাৰ ব্যাপক সমৰ্থন তেওঁলোকৰ লগত আছে। প্ৰচাৰৰ সময়ত তেওঁ চৰকাৰৰ উন্নয়নমূলক কামসমূহৰ ওপৰত বিশেষ গুৰুত্ব আৰোপ কৰিছে। ৰাস্তা-ঘাট, শিক্ষা, স্বাস্থ্য আৰু কৃষিক্ষেত্ৰত হোৱা উন্নয়নসমূহ উল্লেখ কৰি তেওঁ কয় যে এই উন্নয়নেই এইবাৰৰ নিৰ্বাচনত এনডিএৰ মুখ্য শক্তি হ’ব।
আনহাতে, ইউপিপিএলৰ প্ৰাৰ্থী প্ৰমোদ বড়োয়েও সমষ্টিটোত ব্যাপক প্ৰচাৰ চলাই আছে। তেওঁ নিজৰ দলৰ কৰ্মসূচী আৰু বিটিচি অঞ্চলত কৰা উন্নয়নমূলক কামসমূহৰ জৰিয়তে জনতাৰ আস্থা লাভৰ চেষ্টা কৰিছে। ফলস্বৰূপে তামুলপুৰত দুয়োপক্ষৰ মাজত তীব্ৰ প্ৰতিদ্বন্দ্বিতা গঢ় লৈ উঠিছে।মুঠতে ক’বলৈ গ’লে, ৪৩নং তামুলপুৰ বিধানসভা সমষ্টিৰ নিৰ্বাচনী পৰিস্থিতি এতিয়া অত্যন্ত উত্তেজনাপূৰ্ণ। এনডিএৰ বিশ্বজিৎ দৈমাৰী আৰু ইউপিপিএলৰ প্ৰমোদ বড়োৰ মাজৰ এই যুঁজে আগন্তুক দিনসমূহত আৰু অধিক তীব্ৰ ৰূপ লোৱাৰ সম্ভাৱনা আছে।
নিয়মীয়া বাৰ্তা, বৰমা, ২২ মাৰ্চ :