ফিফা বিশ্বকাপ ২০২৬ত কিলিয়ান এমবাপেৰ অনবদ্য প্ৰদৰ্শনৰ সহায়ত সোমবাৰে (২২ জুন) ইৰাকক ৩-০ গ’লত পৰাস্ত কৰি শীৰ্ষ-৩২ৰ স্থান প্ৰায় নিশ্চিত কৰিলে ফ্ৰান্সে। বজ্ৰপাত আৰু ধুমুহাৰ বাবে প্ৰায় দুঘণ্টা বন্ধ হৈ থকা খেলখনত এমবাপে দুবাৰ গ’ল কৰাৰ লগতে দ্বিতীয়াৰ্ধত বেলন ডি’অৰ বিজয়ী উছমান ডেম্বেলেও এটা গ’ল যোগ দিয়ে।
প্ৰথমাৰ্ধৰ ১৪ মিনিটতে মাইকেল অলিছেৰ পাছৰ পৰা বক্সৰ বাহিৰৰ পৰা শক্তিশালী শ্বট মাৰি ফ্ৰান্সক আগুৱাই দিয়ে এমবাপে। ইয়াৰ পিছত ধুমুহাৰ বাবে দ্বিতীয়াৰ্ধ আৰম্ভ হোৱাত প্ৰায় দুঘণ্টাৰ বিলম্ব হয়। পুনৰ খেল আৰম্ভ হোৱাৰ পিছত ইৰাকৰ ভুলৰ সুযোগ লৈ ডেম্বেলেৰ সহায়ত সহজেই নিজৰ দ্বিতীয়টো গ’ল সম্পূৰ্ণ কৰে এমবাপে। ১২ মিনিট পিছতে পুনৰ অলিছেৰ নিখুঁত পাছৰ পৰা ডেম্বেলেই তৃতীয় গ’লটো কৰি ফ্ৰান্সৰ জয় নিশ্চিত কৰে।
এই দুটা গ’লৰ জৰিয়তে বিশ্বকাপ ইতিহাসত এমবাপেৰ মুঠ গ’লৰ সংখ্যা ১৬টালৈ বৃদ্ধি পায় আৰু জাৰ্মানীৰ প্ৰাক্তন তাৰকা মিৰ’ছ্লাভ ক্ল’জেৰ অভিলেখ স্পৰ্শ কৰে। ইয়াৰ পূৰ্বে আৰ্জেণ্টিনাৰ লিঅ’নেল মেছিয়ে অষ্ট্ৰিয়াৰ বিৰুদ্ধে জোৰা গ’ল কৰি বিশ্বকাপত ১৮টা গ’লৰ নতুন মাইলৰ খুঁটি স্থাপন কৰিছিল। চলিত বিশ্বকাপত এমবাপেৰ মুঠ গ’লৰ সংখ্যা চাৰিটা, যাৰ ফলত গোল্ডেন বুটৰ দৌৰত তেওঁ মেছিৰ পৰা মাত্ৰ এটা গ’ল পিছ পৰি আছে।
খেলখনৰ নাটকীয়তাৰ মূল কাৰণ আছিল বতৰ। প্ৰথমাৰ্ধ শেষ হোৱাৰ লগে লগে ধুমুহা আৰু বৰষুণ আৰম্ভ হোৱাত দৰ্শকসকলক নিৰাপদ স্থানলৈ যাবলৈ নিৰ্দেশ দিয়া হয়। প্ৰায় ১ ঘণ্টা ৪০ মিনিট পিছত খেলুৱৈসকল পুনৰ ওলাই আহে যদিও খেলপথাৰত জমা হোৱা পানী আঁতৰোৱাৰ পিছতহে খেলখন পুনৰ আৰম্ভ কৰা সম্ভৱ হয়।
ডিজিটেল ডেস্ক, ২৩ জুন