নতুন দিল্লীৰ যন্তৰ মন্তৰত শনিবাৰে প্ৰতিবাদস্থলত এক উত্তেজনাপূৰ্ণ পৰিস্থিতিৰ সৃষ্টি হয়, যেতিয়া Cockroach Janta Party (CJP)-ৰ প্ৰতিষ্ঠাপক অভিজিৎ ডীপকে ভাষণ দি থকা অৱস্থাত এগৰাকী মহিলাই তেওঁৰ ওপৰত চিঞাহী নিক্ষেপ কৰে।
এই ঘটনাৰ পিছতে প্ৰতিবাদকাৰীসকল মঞ্চৰ ফালে দৌৰি যোৱাত কিছু সময়ৰ বাবে বিশৃংখল পৰিস্থিতিৰ সৃষ্টি হয় আৰু অনুষ্ঠান সাময়িকভাৱে ব্যাহত হয়। মহিলাগৰাকীৰ পৰিচয় বা এই কাৰ্যৰ আঁৰৰ উদ্দেশ্য তাৎক্ষণিকভাৱে জানিব পৰা হোৱা নাই।
এই ঘটনা সংঘটিত হয় সেই সময়ত, যেতিয়া অভিজিৎ ডীপকেই ঘোষণা কৰিছিল যে সামাজিক কৰ্মী ছোনম ৱাংচুকক দিল্লী আৰক্ষীয়ে অনশনস্থলৰ পৰা চিকিৎসালয়লৈ নিয়াৰ পিছত তেওঁ অনিৰ্দিষ্টকালীন অনশনত বহিব।
উল্লেখ্য যে, ২৮ জুনৰ পৰা ছোনম ৱাংচুকে NEET পৰীক্ষাত অনিয়মৰ বিৰুদ্ধে CJP-ৰ নেতৃত্বত চলি থকা আন্দোলনৰ সমৰ্থনত অনিৰ্দিষ্টকালীন অনশন আৰম্ভ কৰিছিল। চিকিৎসকসকলৰ মতে, অনশনৰ ফলত তেওঁৰ প্ৰায় ৯.৫ কিলোগ্ৰাম ওজন হ্ৰাস পাইছিল আৰু তেওঁৰ ৰক্তচাপ আৰু ৰক্তত চেনিৰ মাত্ৰা নিয়মিতভাৱে পৰ্যবেক্ষণ কৰা হৈছিল।
অভিজিৎ ডীপকেই সামাজিক মাধ্যমত অভিযোগ উত্থাপন কৰি কয় যে এই অভিযানৰ সময়ত প্ৰতিবাদকাৰীসকলক আটক কৰাৰ লগতে আৰক্ষীয়ে বলপ্ৰয়োগ কৰিছিল।
আৰক্ষীৰ সূত্ৰ অনুসৰি, সমগ্ৰ অভিযানটো অতি গোপনে পৰিকল্পনা কৰা হৈছিল। কেৱল কিছুমান জ্যেষ্ঠ আৰক্ষী বিষয়াই পূৰ্ণ পৰিকল্পনাৰ বিষয়ে জানিছিল। অভিযানটো পুৱতিনিশা চলোৱাৰ সিদ্ধান্ত লোৱা হৈছিল, কিয়নো সেই সময়ত প্ৰতিবাদকাৰীৰ সংখ্যা তুলনামূলকভাৱে কম থাকে।
ঘটনাৰ পূৰ্বে অভিজিতে অনশনস্থলৰ পৰা কিছু সময়ৰ বাবে আঁতৰি থকাৰ সুযোগ গ্ৰহণ কৰি, নতুন দিল্লী জিলাৰ বিশেষ শাখা আৰু স্থানীয় আৰক্ষীৰ ৩০-৩৫জনকৈ আৰক্ষী প্ৰতিবাদস্থলত প্ৰৱেশ কৰে।
আৰক্ষীসকলে প্ৰথমে ছোনম ৱাংচুকৰ বিছনাখন চাৰিওফালৰ পৰা ডাঙৰ বগা চাদৰেৰে আৱৰি দিয়ে, যাতে অভিযানটো জনসমক্ষে দৃশ্যমান নহয় আৰু কোনো বিশৃংখল পৰিস্থিতিৰ সৃষ্টি নকৰে।
সূত্ৰসমূহে জনোৱা মতে, ছোনম ৱাংচুকক তিনিটা সুৰক্ষা বলয়ৰ মাজেৰে অনশনস্থলৰ পৰা বাহিৰলৈ নিয়া হৈছিল। প্ৰথম বলয়ত সাধাৰণ পোছাকৰ আৰক্ষীয়ে মঞ্চ সুৰক্ষিত কৰি ৱাংচুকক বাহিৰলৈ লৈ যায়। দ্বিতীয় বলয়ত CRPF আৰু RAF-ৰ জোৱানসকলে প্ৰতিবাদকাৰীসকলক বাধা দি কোনো সংঘাতৰ সৃষ্টি হ’বলৈ নিদিয়ে, তৃতীয় বলয়ত জ্যেষ্ঠ দিল্লী আৰক্ষী বিষয়াসকলে এম্বুলেন্স আৰু আৰক্ষীৰ বাহনৰ ওচৰৰ নিয়ন্ত্ৰণ কেন্দ্ৰৰ পৰা সমগ্ৰ অভিযানটো তদাৰক কৰে।
ইয়াৰ পিছত ছোনম ৱাংচুকক এম্বুলেন্সত উঠাই ছফদৰজং চিকিৎসালয়লৈ লৈ যোৱা হয়। যাত্ৰাপথত ট্ৰেফিক আৰক্ষীয়ে সম্পূৰ্ণ পথ খালী কৰি দিছিল, যাতে এম্বুলেন্সখন কোনো বাধা নোহোৱাকৈ চিকিৎসালয়ত উপস্থিত হ’ব পাৰে।
ডিজিটেল ডেস্ক, ১৮ জুলাই