নিয়মীয়া বাৰ্তা, ১৭ এপ্রিলঃ মাৰাত্মক ক’ৰোনা ভাইৰাছে বিশ্ব অর্থনীতিলৈ বিপর্যয় নমাই আনিছে যদিও ভাইৰাছবিধৰ প্রতিৰোধৰ ক্ষেত্রত পৃথিৱীৰ অন্য অঞ্চলৰ তুলনাত এছিয়াৰ দেশসমূহে সফলভাৱে যুঁজ দিবলৈ সক্ষম হৈছে ৷ শেহতীয়াকৈ আন্তর্জাতিক মুদ্রানিধি (আইএমএফ)ৰ এছিয়া প্রশান্ত মহাসাগৰীয় অঞ্চলৰ বাবে থকা বিভাগৰ সঞ্চালক চাং য়ং ৰীয়ে পিটিআইৰ সৈতে হোৱা এক সাক্ষাৎকাৰত এই মন্তব্য আগবঢ়াইছে ৷ ৰীৰ মতে মাৰাত্মক ভাইৰাছবিধৰ সংক্রমণত প্রতিৰোধৰ ক্ষেত্রত এছিয়াৰ দেশসমূহে যি হাৰত যুঁজ দিছে ইয়াৰ দ্বাৰা এছিয়াৰ দেশসমূহ শীঘ্রে ভাইৰাছবিধৰ পৰা পৰিত্রাণ পোৱাটো নিশ্চিত হ’ব৷ প্রতিৰোধী ব্যৱস্থা কার্যকৰী নহ’লে এছিয়াৰ পৰিস্থিতি অৱশ্যে অধিক ভয়াৱহ হ’ব বুলি সতর্কবাণী কৰিছে ৰীয়ে৷ লক্ষণীয়ভাৱে এই সময়ছোৱাত বিশ্বৰ অন্য অঞ্চলতকৈ এছিয়াত আর্থিক বৃদ্ধিৰ হাৰ বেছি বুলি উল্লেখ কৰিছে সঞ্চালক ৰীয়ে৷ ২০২০ চনটো বিশ্বৰ অন্যান্য অঞ্চলৰ লগতে এছিয়াৰ বাবেও প্রত্যাহ্বানৰ বুলি উল্লেখ কৰি বছৰটোৰ শেষলৈ বৃদ্ধিৰ হাৰ শূন্য হ’ব বুলি ঘোষণা কৰিছে নেত্রীগৰাকীয়ে৷ স্মর্তব্য যে বিগত ৬০ বছৰত এছিয়া এনে সংকটৰ সন্মুখীন হোৱা নাছিল ৷