নিয়মীয়া বাৰ্তা, ২৭ এপ্ৰিলঃ ক’ৰোনা ভাইৰাছে সমগ্র বিশ্বতে বিভীষিকাময় পৰিৱেশ সৃষ্টি কৰাৰ সময়ত আর্তজনক সহায় কৰিবলৈ ওলাই আহিছে সমাজৰ বিভিন্নজন৷ গুৱাহাটী তথা গুৱাহাটী মহানগৰীৰ পার্শ্বৱর্তী ঠাইত বহুসংখ্যক দুখীয়া লোকক আহাৰ যোগান ধৰি আহিছে অমৃত ভোগ ভাণ্ডাৰ নামৰ স্বেচ্ছাসেৱী সংস্থাটোৱে৷ এই সম্পর্কে স্বেচ্ছাসেৱী সংস্থাটোৰ হৈ সহঃ সংযোজক আলোক সন্থালিয়াই কয়, ‘আমি প্রথমবাৰৰ বাবে এই কার্যসূচী আৰম্ভ কৰিছোঁ৷ আমি ২৮ মার্চৰ পৰা সমগ্র গুৱাহাটীত আৰম্ভ কৰা আহাৰ বিতৰণ কার্যসূচী লকডাউন নোখোলালৈকে অব্যাহত ৰাখিম৷ প্রথম তিনি হাজাৰ দুখীয়া লোকৰ মাজত পুৱাৰ আহাৰ, দুপৰীয়াৰ আহাৰ আৰু সন্ধিয়াৰ আহাৰ যোগান ধৰি আহিছিলোঁ৷ এতিয়া আমি প্রতিদিনে ২০ হাজাৰ দুখীয়া লোকক সামগ্রী বিৰতণ কৰি আছোঁ৷ ফাঁচীবজাৰৰ কেদাৰ পথৰ ৰিতুৰাজ হোটেলৰ ৰান্ধনীশালত আহাৰসমূহ ৰন্ধা হৈছে৷ ইয়াৰ বাবে আমি ৰিতুৰাজ হোটেলৰ মালিকবসন্ত সুৰানা, আকাশ সুৰানা আৰু প্রবন্ধক সঞ্জয় কুৰেছিয়াক ধন্যবাদ জনালোঁ৷ শ্রীৰাম সমিতিয়, সেৱা ভাৰতী, লায়ন্স ক্লাব, অহিংসা ক্লাব আদিৰ লগতে বি এছ এফ, এন ডি আৰ এফ আদিয়ে আমাৰ পৰা খাদ্যসামগ্রী সংগ্রহ কৰি দুখীয়া লোকৰ মাজত বিতৰণ কৰে৷
প্রতিদিনে পুৱা ৯ বজাৰ পৰা সন্ধিয়া ৬.৩০ বজালৈ আমি আহাৰ বিতৰণ কৰোঁ৷’ এই সম্পর্কে অমৃত ভোগ ভাণ্ডাৰৰ মুখ্য বিষয়া ভাগচন্দ্র জৈনে কয় ‘আমি সম্পূর্ণ পৰিষ্কাৰ, পৰিচ্ছন্নতাত গুৰুত্ব দিছোঁ লগতে চৰকাৰী নীতি–নিয়ম সম্পূর্ণভাৱে পালন কৰি আহিছোঁ৷ লগতে উন্নত মানৰ আহাৰ যোগান ধৰি আছোঁ৷ ৰিতুৰাজ হোটেলৰ ১৯জন কর্মচাৰীৰ লগতে মুঠ ৭০জন কর্মচাৰী এই সম্পূর্ণ কার্যসূচীৰ সৈতে জডিত হৈ আছে৷ আমি বানপানীৰ সময়তো দুর্গতসকলৰ বাবে এনে সেৱা আগবঢ়াম৷’