নিয়মীয়া বাৰ্তা ৪ মেঃ গুজৰাটৰ দাহোড়ৰ খাংগেলাত কালি একাংশ বহিঃৰাজ্যৰ শ্রমিকে আৰক্ষীলৈ শিলগুটি দলিওৱাৰ পাছতে উত্তপ্ত পৰিস্থিতিৰ সৃষ্টি হয়৷ বিক্ষুব্ধ শ্রমিকে আৰক্ষীৰ গাড়ীলৈ লক্ষ্য কৰি শিলগুটি দলিয়াই যদিও কোনো লোক হতাহত হোৱা নাই৷ কিন্তু কেইবাখনো বাহনৰ ক্ষতিসাধন হোৱা বুলি দাহোড়ৰ আৰক্ষী অধীক্ষকগৰাকীয়ে সংবাদ মাধ্যমক জানিবলৈ দিছে৷ ইতিমধ্যে এই ঘটনা সন্দর্ভত এক গোচৰ ৰুজু কৰি আৰক্ষীয়ে ৪০গৰাকীতকৈ অধিক লোকক তাৎক্ষণিকভাৱে আটক কৰিছে৷ আৰক্ষী সূত্রই সদৰী কৰা অনুসৰি, শিলগুটি দলিওৱা শ্রমিকসকলৰ গৰিষ্ঠসংখ্যক উত্তৰ প্রদেশৰ৷ কাৰণ উত্তৰ প্রদেশৰ পৰা অহা শ্রমিকসকলে চহৰখনৰ বিভিন্ন অস্থায়ী ক্ষেত্রত কাম কৰি আহিছে৷