নিয়মীয়া বাৰ্তা, ২৬ মেঃ হাজো আৰু চাবুৱাত সংঘটিত দুটা পৃথক ঘটনাত দুগৰাকী নিৰীহৰ মৃত্যু হোৱা বিষয়টো গুৰুত্বসহকাৰে লৈছে গৃহ বিভাগৰ দায়িত্বত থকা ৰাজ্যৰ মুখ্যমন্ত্রী সর্বানন্দ সোণোৱালে৷ মুখ্যমন্ত্রীৰ নির্দেশত চাবুৱাৰ আক্রমণৰ লগত জড়িত ১২গৰাকী লোকক ইতিমধ্যে গ্রেপ্তাৰ কৰা হৈছে৷ হাজোৰ ঘটনাটোও প্রতি ঘণ্টাৰ মূৰে মূৰে নিৰীক্ষণ কৰি আছে মুখ্যমন্ত্রী সোণোৱালে৷
এক সংবাদ মেলত এই কথা প্রকাশ কৰিছে ৰাজ্যৰ আৰক্ষী সঞ্চালকপ্রধান ভাস্কৰজ্যোতি মহন্তই৷ সংবাদ মাধ্যমক সম্বোধন কৰি ডিজিপি মহন্তই কয় যে চাবুৱাৰ কয়লাবাৰী নামৰ ঠাইত ৰাষ্ট্রীয় ঘাইপথৰ ওপৰত কৰা এক নির্মাণকার্যৰ বাবে দুটা বিশেষ সম্প্রদায়ৰ মাজত সংঘাতৰ সূত্রপাত ঘটে৷ দুটা যুৱকৰ দল কাজিয়াত লিপ্ত হয় আৰু এই ঘটনাত দুজন যুৱক আহত হয়৷ পৰাগজ্যোতি নেওগ নামৰ আহত যুৱকজনৰ মৃত্যু হয়৷ এই ঘটনা সংক্রান্তত চাবুৱা থানাত ভাৰতীয় দণ্ডবিধিৰ ১২০/১২০ (বি)/১৪৭/১৪৮ আৰু ৩০২ ধাৰাৰ অধীনত ১০০/২০নং গোচৰটো ৰুজু কৰা হৈছে৷
ৰাজ্যৰ মুখ্যমন্ত্রী সর্বানন্দ সোণোৱালে নিজে উদ্যোগ লৈ হত্যাকাৰীক কৰায়ত্ত কৰিবলৈ কঠোৰ নির্দেশ দিয়ে৷ তাৰ পাছতে আৰক্ষীয়ে ১২জন অভিযুক্তক গ্রেপ্তাৰ কৰে৷ ইফালে অনুৰূপ ঘটনা এটা যোৱা ২২ মে’ত সংঘটিত হৈছিল হাজোত৷ ২২ মে’ৰ দুপৰীয়া প্রায় ১২.৩০মান বজাত এটা দুর্ঘটনাক কেন্দ্র কৰি হোৱা আক্রমণৰ ঘটনাত এজন লোক আহত হৈছিল৷ এই লোকজনৰ ২৩ তাৰিখে মৃত্যু হয়৷ ইতিমধ্যে হাজো থানাত ভাৰতীয় দণ্ডবিধিৰ ১২০ (বি) আৰু ৩০২ ধাৰাৰ অধীনত ৪৮০/২০নং গোচৰটো ৰুজু কৰা হৈছে৷ ফাইজুল হক আৰু ইউচুদ্দিন আহমেদ নামৰ অভিযুক্ত দুজন ইতিমধ্যে আৰক্ষীৰ জালত পৰিছে৷ আন তিনিজন অভিযুক্ত পলাতক অৱস্থাত আছে৷ ইয়াৰে এজনে অৱশ্যে আক্রমণৰ বলি হোৱা লোকজনক উদ্ধাৰ কৰি চিকিৎসাধীন কৰোৱাত আগভাগ লোৱা বুলি জানিব পৰা গৈছে৷
মুখ্যমন্ত্রী সর্বানন্দ সোণোৱালে প্রতি ঘণ্টাৰ মূৰে মূৰে পৰিস্থিতি নিৰীক্ষণ কৰি আছে আৰু আন অভিযুক্তকেইজনক কৰায়ত্ত কৰিবলৈ আৰক্ষীয়ে অভিযান অব্যাহত ৰাখিছে৷ যিহেতু দুয়োজন ভুক্তভোগীয়ে অতি দুখীয়া পৰিয়ালৰ, গতিকে নিহত পৰাগজ্যোতি নেওগ আৰু সনাতন ডেকাৰ পৰিয়াললৈ মুখ্যমন্ত্রীৰ সাহায্য পুঁজিৰ পৰা ২ লাখকৈ টকা আগবঢ়োৱাৰ কথাও ডিজিপি ভাস্কৰজ্যোতি মহন্তই সদৰী কৰে৷
তেওঁ লগতে কয় যে দুয়োটা ঘটনাক লৈ হিন্দু–মুছলমান উভয় সম্প্রদায়ৰ কিছুসংখ্যক লোকে ছ’চিয়েল মিডিয়াযোগে সাম্প্রদায়িক ৰহণ সানিবলৈ চেষ্টা কৰা পৰিলক্ষিত হৈছে৷ ক’ৰোনা মহামাৰীৰ ভয়াৱহ সংক্রমণৰ সময়ত এনেধৰণৰ কাম–কাজ কেতিয়াও কাম্য নহয়৷ আৰক্ষীয়ে জাতি–ধর্ম অনুসৰি কোনো অভিযুক্তকে ৰেহাই নিদিয়ে৷ সকলো আক্রমণকাৰীৰ বিৰুদ্ধে ব্যৱস্থা গ্রহণ কৰিবই৷ গতিকে কোনো লোককে প্রৰোচনামূলক মন্তব্য নিদিবলৈ আৰক্ষী সঞ্চালকপ্রধানগৰা সকীয়াই দিয়ে৷