নিয়মীয়া বাৰ্তা, ১ জুনঃ কামৰূপ জিলাৰ ছয়গাঁও আৰক্ষী থানাৰ অন্তৰ্গত গৰৈমাৰীৰ হাতীশলাত ছয়গাঁও আৰক্ষীয়ে দুখন চুৰি গাড়ী উদ্ধাৰ কৰে । উদ্ধাৰ কৰা টাটা ডি আই খনৰ নম্বৰ হ’ল এ এছ ২৫ চি চি ৪৯৫০ আৰু মটৰ চাইকেল খনৰ নম্বৰ হল এ এছ ২৫ এন ৯১৭৪ । উদ্ধাৰ কৰা গাড়ী দুখন ছয়গাঁও আৰক্ষীয়ে গোৱালপাৰা আৰক্ষীক হস্তান্তৰ কৰে । উল্লেখ্য যে কামৰূপ জিলাৰ ছয়গাঁও আৰক্ষী থানাৰ অন্তৰ্গত গৰৈমাৰীৰ হাতীশলা পামত শনিবাৰে নিশা ছয়গাঁও আৰক্ষীয়ে অভিযান চলাই ৰাষ্ট্ৰীয় ঘাইপথৰ পৰা ট্ৰাক অপহৰণৰ লগত জড়িত এজন লোকক নিজ বাসগৃহৰ পৰা আটক কৰে ।
জানিব পৰা মতে, ছয়গাঁও আৰক্ষী থানাৰ ভাৰপ্ৰাপ্ত আৰক্ষী বিষয়া কপিল পাঠকৰ নেতৃত্বত আৰক্ষীয়ে গ্ৰেপ্তাৰ কৰা এই ট্ৰাক অপহৰণ কাৰী জন হ’ল হাতীশলা পামৰ লোকমান আলীৰ পুত্ৰ আব্দুল হালীম । দুধনৈ থানাত পঞ্জীভুক্ত গোচৰ নম্বৰ ২৫/২০২০ ইউ/এছ-৩৯২ আই পি চি আৰু ৩৬/২০২০ ইউ/এছ-৩৯২ আই পি চি গোচৰত ট্ৰাক অপহৰণকাৰী আব্দুল হালীমক আটক কৰা বুলি জানিব পৰা গৈছে । আৰক্ষীয়ে গ্ৰেপ্তাৰ কৰা ট্ৰাক অপহৰণকাৰী আব্দুল হালীমক গোৱালপাৰা আৰক্ষীলৈ ইতিমধ্যে হস্তান্তৰ কৰিছে । উল্লেখ্য যে আটকাধীন লোকজনৰ লগত আৰু কেবাজনো লোক জড়িত থকা বুলি সন্দেহ কৰা হৈছে । উক্ত লোক কেইজন সম্প্ৰতি পলাতক হৈ আছে । সম্প্ৰতি আৰক্ষীৰ তদন্ত অব্যাহত আছে ।