নিয়মীয়া বাৰ্তা, ৩ জুনঃ দক্ষিণ কামৰূপ ছয়গাঁৱত গাড়ী চোৰৰ সন্ত্রাস অব্যাহত আছে । কামৰূপ জিলাৰ ছয়গাঁও আৰক্ষী থানাৰ অন্তৰ্গত মাজগুমিৰ পৰা আজি পুৱতি নিশা ছয়গাঁও আৰক্ষীয়ে এখন চি বি জেদ মটৰ চাইকেল উদ্ধাৰ কৰিবলৈ সক্ষম হয় । উদ্ধাৰ কৰা গাড়ীখনৰ নম্বৰ হল এ এছ ০১ এ ডি ০৫০১ । জানিব পৰা মতে, পলাশবাৰী সমষ্টিৰ অন্তৰ্গত জিয়াকুৰ নোৱাভিঠা গাঁৱৰ ৰবুল বৰাৰ নিজ বাসগৃহৰ পৰা যোৱা ১ জুন তাৰিখে নিশা চি বি জেদ মটৰ চাইকেল খন চুৰি কৰি নিয়াৰ লগতে ৭০৯ ট্ৰাক গাড়ীখনৰ পৰা বেটাৰীটো আৰু বলেৰ’ পিক আপ ভেন গাড়ী খনৰ লকটো ভাঙি থৈ যায় । উক্ত ঘটনা সন্দৰ্ভত যোৱা কালি গাড়ীখনৰ গৰাকী ৰুবুল বৰাই কুকুৰমাৰা পহৰা চকীত এখন এজাহাৰ দাখিল কৰে । উক্ত এজাহাৰৰ ভিত্তিত আৰক্ষীয়ে তদন্ত চলাই আজি পুৱতি নিশা চুৰি হোৱা মটৰ চাইকেল খন ছয়গাঁও আৰক্ষীয়ে উদ্ধাৰ কৰিবলৈ সক্ষম হয় ।