নিয়মীয়া বাৰ্তা, ১৪জুনঃ ২০২০ বৰ্ষটো যেন এটা অমানিশাৰ বছৰ। বলীউডৰ কেইজনো অভিনেতাৰ মৃত্যুৰ খবৰে কঁপাই যোৱাৰ সময়তে পুনৰ এটা দুখজনক খবৰ।
জনপ্ৰিয় অভিনেতা সুশান্ত সিং ৰাজপুতৰ আত্মহত্যাই সকলোকে স্তম্ভিত কৰি তুলিছে। আজি মুম্বাইৰ বান্দ্ৰাস্থিত বাসগৃহত আত্মহত্য়া কৰে অভিনেতাজনে। আজি পুৱা অভিনেতাজনৰ ঘৰুৱা সহকাৰী যুৱকজনে মুম্বাই আৰক্ষীক খবৰ দিয়াৰ পাছতে পোহৰলৈ আহে এই ঘটনা।
ইতিমধ্য়ে ঘটনাস্থলীত উপস্থিত হৈছে মুম্বাই আৰক্ষী। ঘৰুৱা সহকাৰী যুৱকজনৰ সোধা-পোছা অব্যাহত ৰাখিছে। যোৱা ৯জুনত সুশান্তৰ প্ৰাক্তন মেনেজাৰগৰাকীয়েও আত্মহত্যা কৰিছিল। অতিশয় হতাশগ্ৰস্ত হৈ আত্মহত্যা কৰিছে বুলি মন্তব্য কৰিছে একাংশই। আৰক্ষীৰ অনুসন্ধানত পিছতহে পোহৰলৈ আহিব প্ৰকৃত সত্য। জনপ্ৰিয় অভিনেতাগৰাকীৰ মৃত্যুত শোক প্ৰকাশ কৰিছে সকলোৱে।