নিয়মীয়া বাৰ্তা
অসমৰ সৰ্বাধিক প্ৰচলিত দৈনিক বাতৰিকাকত

হটবেডত পৰিণত হোৱা বিষ্ণুপুৰত ৮টা কনটেইনমেণ্ট জ’ন

মহানগৰীত ক’ভিড সংক্রমিত দন্ত চিকিৎসক

নিয়মীয়া বাৰ্তা ২০ জুনঃ ৰাজ্যৰ আন প্রান্তৰ লগতে ৰাজধানী চহৰ গুৱাহাটীত বৃদ্ধি পাইছে ক’ৰোনাৰ সংক্রমণ৷ বিশেষকৈ ভ্রমণ বৃত্তান্ত নোহোৱাকৈয়ে একাংশ লোক ক’ৰোনাত আক্রান্ত হোৱাত মহানগৰীত সামাজিক সংক্রমণৰ আশংকা কৰা হৈছে৷ পুনৰ মহানগৰীত এনে কেইবাগৰাকীও ব্যক্তি ক’ৰোনাত আক্রান্ত হোৱাৰ তথ্য পোহৰলৈ আহিছে৷ কোনো ভ্রমণ বৃত্তান্ত নোহোৱাকৈয়ে মহানগৰীত এজন দন্ত চিকিৎসক আক্রান্ত হৈছে ক’ৰোনাত৷ প্রাপ্ত তথ্য অনুসৰি ক’ভিড–১৯ত আক্রান্ত হোৱা মহানগৰীৰ দন্ত চিকিৎকজন হৈছে অনুপম ডেকা৷ কামাখ্যাগেটৰ বাসিন্দা ডেকাৰ লাচিত নগৰত আছে ডেণ্টেল ক্লিনিক৷ যাৰ বাবে দন্ত চিকিৎসকজনৰ সংস্পর্শলৈ বহু ব্যক্তি অহাৰ আশংকা কৰা হৈছে৷ ইপিনে, অনিল নগৰৰ বাসিন্দা এজন ৰিক্সাচালকৰ শৰীৰতো ধৰা পৰিছে ক’ৰোনা ভাইৰাছৰ উপস্থিতি৷ ক’ৰোনাত আক্রান্ত ৰিক্সাচালকজন ৰাজকুমাৰ মণ্ডল বুলি জানিব পৰা গৈছে৷ ইতিমধ্যে ৰিক্সাচালকজনে বাস কৰা বাসগৃহটো কনটেইনমেণ্ট জ’ন ঘোষণা কৰিছে মহানগৰ প্রশাসনে৷ লক্ষণীয় যে ৰিক্সাচালকজনৰ পত্নীয়ে অঞ্চলটোৰ কেইবাঘৰতো কাম কৰিছিল৷ যাক লৈ শংকিত হৈ পৰিছে অঞ্চলটোৰ বাসিন্দাসকল৷ মহানগৰীৰ মালিগাঁৱৰ অষ্টম এ পি বি এনৰ শিবিৰৰ এজন জোৱানৰ শৰীৰত ধৰা পৰিছে ক’ভিড–১৯৷ দিগন্ত ৰাভা নামৰ জোৱানজনক ক’ভিড–১৯ত আক্রান্ত হোৱাৰ পাছত চিকিৎসালয়ত ভর্তি কৰা হৈছিল৷ মালিগাঁৱৰ নেতাজী বিদ্যাপীঠ স্কুলত বাহৰ পাতি থকা শিবিৰটোৰ এজন জোৱানৰ শৰীৰত কিছুদিন পূর্বে ধৰা পৰিছিল ক’ৰোনা ভাইৰাছ৷ তদুপৰি মালিগাঁৱত উত্তৰ প্রদেশৰ পৰা অহা এটা পৰিয়ালৰ দেহতো ধৰা পৰিছে ক’ৰোনা ভাইৰাছ৷ আনহাতে, মহানগৰীত ক’ৰোনাৰ হটবেডত পৰিণত হৈছে বিষ্ণুপুৰ অঞ্চল৷ প্রাপ্ত তথ্য অনুসৰি, বিষ্ণুপুৰৰ মুঠ ৮টা অঞ্চল কনটেইনমেণ্ট জ’ন ঘোষণা কৰা হৈছে৷ ইয়াৰে বিমলা নগৰতে ১৩জন লোক ক’ৰোনাত আক্রান্ত হৈছে৷ তৎসত্ত্বেও এই অঞ্চলৰ একাংশ লোকে প্রশাসনৰ বিৰুদ্ধে ওলাই অহা কার্যই প্রতিক্রিয়াৰ সৃষ্টি কৰিছে৷ কনটেইনমেণ্ট জ’ন ঘোষণা কৰাৰ ফলত অসুবিধাৰ সন্মুখীন হৈছে বুলি সংবাদ মাধ্যমৰ আগত প্রকাশ কৰিছে স্থানীয় লোকসকলে৷

উল্লেখ্য যে দিনক দিনে মহানগৰীত বৃদ্ধি পাইছে কনটেইনমেণ্ট জ’নৰ সংখ্যা৷ কামৰূপ মহানগৰ জিলা প্রশাসনৰ তথ্য অনুসৰি আজিৰ দিনটোত গুৱাহাটীত কনটেইনমেণ্ট জ’নৰ সংখ্যা হৈছে ১৫৫টা৷ ইয়াৰ ৩৭টা কনটেইনমেণ্ট জ’ন প্রত্যাহাৰ কৰা হৈছে৷ বর্তমান সক্রিয় কনটেইনমেণ্ট জ’নৰ সংখ্যা হৈছে ১১৮টা৷ ইফালে, মহানগৰীৰ দুজন ক’ভিড–১৯ত আক্রান্তই পাঞ্জাবাৰীৰ শ্রীমন্ত শংকৰদেৱ কলাক্ষেত্রৰ ঠিকনা দিয়াত হাহাকাৰ সৃষ্টি হৈছে আৰক্ষীৰ৷ এটা সূত্রই প্রকাশ কৰা অনুসৰি শ্রীমন্ত শংকৰদেৱ কলাক্ষেত্রত কাম কৰিবলৈ বহিঃৰাজ্যৰ পৰা অনা শ্রমিকৰ শৰীৰত ক’ৰোনা ভাইৰাছ ধৰা পৰিছে৷ ক’ৰোনা ভাইৰাছৰ সংক্রমণে গুৰুতৰ ৰূপ ধাৰণ কৰাৰ সময়ত শ্রীমন্ত শংকৰদেৱ কলাক্ষেত্রত বৈদ্যুতিক কাম–কাজৰ বাবে বহিঃৰাজ্যৰ শ্রমিক অনা কার্যই বিপদ মাতিব বুলি সূত্রটোৱে আশংকা প্রকাশ কৰিছে৷ একে সময়তে এতিয়াও শ্রীমন্ত শংকৰদেৱ কলাক্ষেত্রত কর্মচাৰীৰ উপস্থিতিৰ বাবে পাঞ্চিং মেচিন ব্যৱহাৰ কৰি থকা বুলিও সূত্রটোৱে প্রকাশ কৰিছে৷ যাৰ বাবে শ্রীমন্ত শংকৰদেৱ কলাক্ষেত্রত সামাজিক সংক্রমণৰ আশংকা কৰা হৈছে৷

You might also like