নিয়মীয়া বাৰ্তা, ২৯ জুনঃ কালি মহানগৰীৰ খাৰঘুলিৰ হিড়িম্বাপুৰ, কৈলাসপুৰ, শিলপুখুৰীৰ নৱগ্রহ মন্দিৰ, গীতামন্দিৰৰ ভগদত্ত পথ, ধীৰেনপাৰাৰ ৰত্নগিৰি পথ, নুনমাটিৰ নেপালী চ’ক আৰু পাণ্ডুৰ হিলটপত ভূমিস্খলনৰ ঘটনা সংঘটিত হয়৷ গীতামন্দিৰৰ ভগদত্ত পথটোৰ এছোৱা খহি পৰে৷ পথটো খহি আৰতি তালুকদাৰ নামৰ মহিলাগৰাকীৰ বাসগৃহৰ ওপৰত পৰে৷ সৌভাগ্যক্রমে এই ভূমিস্খলনত কোনো লোক হতাহত নহ’ল৷
বিগত কেইবাদিনো হোৱা বৰষুণৰ ফলত পাহাৰৰ ওপৰৰ পৰা নামি অহা পানীৰ ধলৰ বাবেই পথটো খহি পৰে বুলি স্থানীয় ৰাইজে জানিবলৈ দিছে৷ উক্ত পথটোত প্রায় ১০০ ঘৰ লোকে বসবাস কৰে৷ পথটোৰে এই ঘটনাৰ পাছত যাতায়াত সম্পূর্ণৰূপে বন্ধ হৈ পৰে৷ আনহাতে, পাণ্ডুৰ হিলটপত সংঘটিত ভূমিস্খলনৰ ফলত গার্ড ৱাল খহি প্রদীপ ৰয় নামৰ লোকজনৰ বাসগৃহত পৰে৷ এই ভূমিস্খলনত এগৰাকী বৃদ্ধা সামান্য পৰিমাণে আহত হয় যদিও পৰিয়ালটো সৌভাগ্যক্রমে ৰক্ষা পৰে৷
স্থানীয় ৰাইজে জানিবলৈ দিয়া মতে, অঞ্চলটোৰ পাণ্ডুনাথস্থিত অনুকূল মন্দিৰৰ প্রকাণ্ড অট্টালিকা আৰু গার্ড ৱালো যিকোনো মুহূর্ততে খহি পৰাৰ সম্ভাৱনা আছে৷ মন্দিৰৰ তলত প্রায় ১৫টা পৰিয়ালে বসবাস কৰে৷ সেয়েহে অঞ্চলটোৰ ৰাইজে জিলা প্রশাসনক বিহিত ব্যৱস্থা গ্রহণ কৰিবলৈ আহ্বান জনাইছে৷ একেদৰে ধীৰেনপাৰাৰ ৰত্নগিৰি পথতো ভূমিস্খলনৰ ঘটনা সংঘটিত হয়৷ মুখ্য সচিব কুমাৰ সঞ্জয় কৃষ্ণই জিলা উপায়ুক্তক ভূমিস্খলনপ্রৱণ এলেকাৰ পৰা লোকসকলক স্থানান্তৰিত কৰিবলৈ নির্দেশ দিছিল৷
এই নির্দেশৰ পাছতে জিলা উপায়ুক্ত বিশ্বজিৎ পেগুৱে ভূমিস্খলনপ্রৱণ অঞ্চলত বসবাস কৰা লোকসকলক সুৰক্ষিত স্থানলৈ যাবলৈ আহ্বান জনাইছিল৷ ভূমিস্খলনপ্রৱণ অঞ্চলত বসবাস কৰা লোকসকলক জিলা প্রশাসনে অস্থায়ীভাৱে থকা–খোৱাৰ ব্যৱস্থা কৰিব বুলি জানিবলৈ দিছে৷