কটন বিশ্ববিদ্যালয়ৰ স্নাতক পৰ্যায়ৰ নামভৰ্তিৰ বাবে অনলাইন আবেদনৰ আহ্বান

নিয়মীয়া বাৰ্তা, ২৪ জুলাইঃ ৰাজ্যৰ আগশাৰীৰ শিক্ষানুষ্ঠান কটন বিশ্ববিদ্যালয়ে ক’ৰোনা সংকটৰ প্ৰতি লক্ষ্য ৰাখি ২০২০-২১ বৰ্ষৰ স্নাতক মহলাৰ নামভৰ্তিৰ বাবে অনলাইন আবেদনৰ আহ্বান জনাইছে।

কটন বিশ্ববিদ্যালয়ৰ শৈক্ষিক পঞ্জিয়ক ড০ সঞ্জয় কুমাৰ দত্তই এক জাননী জাৰি কৰি জনাইছে যে কটন বিশ্ববিদ্যালয়ৰ ৱেবচাইট www.cottonuniversity.ac.in. ত গৈ ইচ্ছুক ছাত্ৰ-ছাত্ৰীয়ে নাম পঞ্জিয়ন কৰাৰ লগতে অনলাইন আবেদন কৰিব পাৰিব । লগতে সকলো ছাত্ৰ-ছাত্ৰীয়ে উচ্চ শিক্ষা সঞ্চালকালয়ৰ ৱেবচাইট (link http://dheonlineadmission.amtron.in/sp/.) ত ইউনিক আইডি তৈয়াৰ কৰিব লাগিব।

উল্লেখ্য যে বিশ্ববিদ্যালয়খনৰ স্নাতক মহলাৰ নামভৰ্তিৰ বাবে অনলাইন প্ৰক্ৰিয়া আজিৰে পৰা অৰ্থাৎ ২৪ জুলাইৰ পৰা আৰম্ভ হোৱাৰ বিপৰীতে ছাত্ৰ-ছাত্ৰীসকলে ৭ আগষ্টৰ সন্ধিয়া ৭ বজালৈ আবেদন কৰিব পাৰিব । লগতে বিশ্ববিদ্যালয় কৰ্তৃপক্ষই ১১ আগষ্টত প্ৰথমখন তালিকা (মেৰিট লিষ্ট) প্ৰকাশ কৰিব ।

নামভর্তি প্রক্রিয়াৰ বিষয়ে অধিক জানিবলৈ CU/Acad/UG Admissions/2020/180/503c dated 23/07/2020 জাননীত উল্লেখ কৰা নিৰ্দেশাৱলীসমূহ বিশ্ববিদ্যালয়খনৰ ৱেবচাইট www.cottonuniversity.ac.in ত সহজেই উপলব্ধ হ’ব ।

ইপিনে আগষ্টৰ দ্বিতীয় সপ্তাহত অতিৰিক্ত পাঠ্যক্ৰম সম্পৰ্কীয় (EC & DA) বাবে জাননী জাৰি কৰা হ’ব আৰু প্ৰাৰ্থীসকলে আবেদন পত্ৰ পূৰাওতে লাভ কৰা আবেদনখনৰ সৈতে প্ৰয়োজনীয় নথি-পত্ৰসমূহ মনোনিত ই-মেইলত প্ৰেৰণ কৰিব লাগিব ।

আনহাতে কটন বিশ্ববিদ্যালয় কৰ্তৃপক্ষই এই জাননীত কেৱল অনলাইনৰ মাধ্যমেৰেহে প-পত্ৰ গ্ৰহণ কৰিব বুলি জনাইছে ।

১১ আগষ্ট তাৰিখে মেধা ভিত্তিক তালিকা বিশ্ববিদ্যালয়ৰ ৱেবচাইটত উপলব্ধ হ’ব । লগতে নামভৰ্তি/ কাউন্সিলিঙৰ তাৰিখ আগষ্টৰ দ্বিতীয় সপ্তাহত বিশ্ববিদ্যালয়ে জাৰি কৰিব বুলি স্পষ্ট কৰিছে ।

উল্লেখ্য যে নতুনকৈ স্নাতক পৰ্যায়ৰ কলা শাখাৰ বাবে নামভৰ্তি হ’বলগীয়া বিষয়সমূহ -গণসংযোগ আৰু সাংবাদিকতা, লিবাৰেল আৰ্টছ লগতে বিজ্ঞান শাখাৰ বাবে জৈৱ প্ৰযুক্তি আৰু কম্পিউটাৰ পাঠ্যক্ৰম অন্তৰ্ভুক্ত কৰা হৈছে ।