নিয়মীয়াবাৰ্তা, ৩০ জুলাইঃ জোনাই মহকুমা আৰক্ষীয়ে ড্ৰাগছৰ বিৰুদ্ধে অভিযান চলাই দুজন ড্ৰাগছ সৰবৰাহকাৰী লগতে বহু পৰিমানৰ ড্ৰাগছ, বিভিন্ন নিচাযুক্ত সামগ্ৰী আৰু পাঁচ হাজাৰ টকা জব্দ কৰিবলৈ সক্ষম হয় ৷ আজি দিনৰ ভাগত জোনাই আৰক্ষীয়ে বিশেষ সুত্ৰৰ পম খেদি জোনকাৰেং ৰেষ্টকেম্প, ৰুৱাদ দলুং আৰু আগাম দলুঙ গাঁওসমূহত অভিযান চলাই দুজন ড্ৰাগছ সৰবৰাহ যুৱকক আটক কৰে৷
আনহাতে আটক কৰা যুৱক দুজনৰ স্বীকাৰোক্তিৰ ভিত্তিত আগাম দলঙৰ কেপন্টেইন টায়ুঙ নামৰ যুৱকজনৰ ঘৰত তালাচী চলাই প্ৰায় ৪ গ্ৰাম নিচাযুক্ত সামগ্ৰীসমুহ উদ্ধাৰ কৰিবলৈ সক্ষম হয় ।
উল্লেখ্য যে যুৱকেইজন দীৰ্ঘদিন ধৰি এই ব্যৱসায় কৰি আহিছিল বুলি আৰক্ষীৰে প্ৰকাশ কৰাৰ লগতে স্থানীয় লোকে অভিযোগ উত্থাপন কৰিছে ৷ জোনাই মহকুমাৰ ভাৰপ্ৰাপ্ত আৰক্ষী বিষয়া ভীমকান্ত পেগুৰ নেতৃত্বত যোৱা জোনাই থানাৰ আৰক্ষী দলে ৰুৱাদ দলুঙৰ ৰাজা ওৰফে বিশ্বজিৎ কাৰ্দং (৩৫) পিতা স্বৰ্গীয় ৰাজকুমাৰ কাৰ্দং আৰু জোনকাৰেং ৰেষ্ট কেম্পৰ প্ৰদান পেগু (৩০)পিতা স্বৰ্গীয় জীৱন পেগুক ড্ৰাগছ সহ যুৱক দুজনক আটক কৰি তদন্ত অব্যাহত ৰাখিছে৷
ইফালে বৰ্তমানেও আগাম দলুঙৰ কেপ্তেইন টায়ুং নামৰ ড্ৰাগছ সৰবৰাহকাৰীজন পলাতক অৱস্থাত আছে বুলি জানিব পৰা গৈছে৷