নিয়মীয়া বাৰ্তা ১২ আগষ্টঃ কেন্দ্রীয় গৃহ মন্ত্রালয়ে গঠন কৰা অসম চুক্তিৰ ৬নং দফা ৰূপায়ণ সম্পর্কীয় উচ্চস্তৰীয় সমিতিৰ প্রতিবেদনখন মঙলবাৰে ক্ষোভেৰে ৰাজহুৱা কৰে সদৌ অসম ছাত্র সন্থাই৷ ইয়াৰ পাছতে প্রতিক্রিয়া প্রকাশ কৰিছে ১৪জনীয়া সমিতিখনৰ অধ্যক্ষ, অৱসৰপ্রাপ্ত ন্যায়াধীশ বিপ্লৱ কুমাৰ শর্মাই৷ সংবাদ মাধ্যমৰ আগত তেওঁ কয় যে আছুৱে সম্পূর্ণ ব্যক্তিগতভাৱে প্রতিবেদনখন ৰাজহুৱা কৰিছে৷ অসম চুক্তি স্বাক্ষৰকাৰী সংগঠন হিচাপে আছু এই সমিতিখনত আছিল৷ ৰাজহুৱা কৰাৰ আগতে তেওঁলোকে প্রতিবেদনখন কি হ’ল, সেয়া জানি ল’ব পাৰিলেহেঁতেন৷ হয়তো অতিমাৰীৰ বাবে প্রতিবেদনখন কার্যকৰী কৰাত কিছু পলম হৈছে৷ কাৰণ যিবোৰ বিষয় তাত উল্লেখ আছে, সেয়া এমাহ বা পাঁচ মাহৰ ভিতৰত কার্যকৰী কৰিব পৰা বিষয় নহয়৷ সমিতিৰ পৰামর্শসমূহ কার্যকৰী কৰিবলৈ যথেষ্ট সংশোধনীৰ প্রয়োজন আছে৷ তদুপৰি প্রতিবেদনখন ২ বছৰৰ ভিতৰত কার্যকৰী কৰিবলৈ চৰকাৰক পৰামর্শ আগবঢ়োৱা হৈছে৷ গতিকে ৫ মাহৰ ভিতৰতে এয়া কার্যকৰী কৰিব পৰা নাযায়৷ ইফালে, একেখন সমিতিৰে সদস্য, বিশিষ্ট আইনজীৱী নিলয় দত্তই এই প্রসংগত কয় যে প্রতিবেদনখন ৰাজহুৱা কৰাটো কোনো গোপনীয়তা ভংগ কৰাৰ বিষয় নহয়৷ বৰং এই প্রতিবেদনত কি আছে, সেয়া জনাটো অসমৰ ৰাইজৰ অধিকাৰহে৷ উচ্চস্তৰীয় সমিতিৰ প্রতিবেদন ৰাজহুৱা কৰা বাবে আছু ধন্যবাদৰ পাত্র বুলি তেওঁ মন্তব্য কৰে৷