অসমৰ সকলো জনগোষ্ঠী ঐক্যবদ্ধ হ’লে ভয়তে পলাব আজমল

নিয়মীয়া বাৰ্তা ১০ অক্টোবৰঃ   ২০২১ চনৰ বিধানসভা নির্বাচনত  কংগ্রেছৰে মিত্রতা গঢ়ি বিজেপিক ক্ষমতাচ্যুত কৰাৰ লক্ষ্য লোৱা এ আই ইউ ডি এফৰ মুৰব্বী বদৰুদ্দিন আজমলে  অসমখন ভাগ ভাগ কৰাৰ ষড়যন্ত্রত লিপ্ত হৈছে৷ –এই অভিযোগ ৰাজ্য চৰকাৰৰ জ্যেষ্ঠ মন্ত্রী ড০ হিমন্ত বিশ্ব শর্মাৰ৷ শুকুৰবাৰে শ্রীমন্ত শংকৰদেৱ কলাক্ষেত্রত বিজেপিৰ এক যোগদান অনুষ্ঠানত এই মন্তব্য কৰি মন্ত্রীগৰাকীয়ে  কয়– বৃহত্তৰ অসমীয়া সমাজখনক ভাগ ভাগ কৰাৰ ষড়যন্ত্র চলিছে৷ অসমৰ এচাম বুদ্ধিজীৱীয়ে আৰবীৰ ওচৰত আত্মসমর্পণ কৰিছে৷ আজমলৰ সভাত যেতিয়া আৰবী–উর্দু ভাষা ব্যৱহাৰ হয়, তেতিয়া অসমৰ নেতৃস্থানীয় বুদ্ধিজীৱীসকলে প্রতিবাদ নকৰে৷ তেওঁলোকে প্রশ্ণ নোতোলে এই ভাষা কেনেকৈ আহিল? কিন্তু বাংলা–বড়ো ভাষাৰ ব্যৱহাৰত বেমেজালি হ’লে জাঙুৰ খাই উঠে৷ ড০ শর্মাৰ মন্তব্য– আমাৰ শিক্ষানুষ্ঠানৰ পৰীক্ষাৰ বিভিন্ন প্রশ্ন কাকত আমি অসমীয়া, বড়ো আৰু বাংলা ভাষাত ছপাওঁ৷ কিন্তু কেতিয়াবা এই প্রশ্নকাকত বাঙালী অঞ্চলৰ পৰিৱর্তে অসমীয়া অঞ্চললৈ গ’লে বা বড়ো অঞ্চলৰ পৰিৱর্তে বাঙালী অঞ্চললৈ গ’লে আমাৰ সমালোচনাত সকলো সৰৱ হৈ পৰে৷ কিন্তু যোৱাকেইদিনত বদৰুদ্দিন আজমলৰ সভাত আৰবী আৰু উর্দু ভাষাৰ ব্যৱহাৰ হৈ আছে৷ কিন্তু অসমৰ কোনো নেতৃস্থানীয় বুদ্ধিজীৱীয়ে ইয়াৰ প্রতিবাদ কৰা নাই৷ এই ভাষা ক’ৰ পৰা আহিল প্রশ্ন কৰা নাই৷ এচাম লোকে আৰবীৰ ওচৰত আত্মসমর্পণ কৰিছে৷ তেওঁলোকে ভাবে বড়ো ভাষা প্রচলন কৰাটো ভুল৷ বৰাকত অসমীয়া কিতাপ এখন গ’লে বাঙালী লোকে বেয়া পায়৷ মাজুলীত যদি বাঙালী কিতাপ এখন যায়, অসমীয়া মানুহে বেয়া পায়৷ কিন্তু এইখন অসমতে বদৰুদ্দিন আজমলৰ নেতৃত্বত আৰবী–উর্দু ভাষাৰ প্রচলন চলি আছে৷ আজি আমাৰ নিজৰ মাজত কাজিয়া লগাই জাতি নিঃশেষ কৰাৰ ষড়যন্ত্র চলিছে৷ বড়ো–সমীয়াৰ সংঘাত, কার্বি–ডিমাচাৰ সংঘাত, অসমীয়াৰ লগত বাঙালীৰ সংঘাত চলি আছে৷ লাহে লাহে আমাৰ ভৰিৰ তলৰ ৰাজনৈতিক পথাৰখন আন কৰোবালৈ লৈ গৈছে৷ ভাৰতক মাতৃ বুলি স্বীকাৰ কৰা আমি জাতি–জনগোষ্ঠী ভাগ ভাগ হোৱাৰ প্রক্রিয়াত নামি পৰিছোঁ৷ আমাক কাজিয়া–সংঘাত লগাই দি বাঁওপন্থী লোকসকলে আৰু অসমৰ এটা সাম্প্রদায়িক ৰাজনীতি কৰি থকা শক্তিয়ে অসমখনক দুর্বল কৰাৰ চেষ্টা চলাইছে৷ অসমত এতিয়া ৩৫ শতাংশ লোকে ৬৫ শতাংশ লোকৰ পৰা ৰাজনৈতিক অধিকাৰ লৈ যাব বিচাৰিছে৷ এই ৩৫ শতাংশই ৬৫ শতাংশক শাসন কৰাৰ পৰিৱেশ ৰচনা হৈছে৷ আমি ভাগ ভাগ হৈ থকাত ব্যস্ত হৈ আছোঁ৷ এনেকৈ থাকিলে ১০ বছৰ পাছত আজমলে অসমত সিদ্ধান্ত ল’ব যে বড়োক কি দিয়া হ’ব, মিচিঙক কি দিয়া হ’ব৷ সেই দিনটোলৈ আমি গৈ আছোঁ৷ এই দিনটো আমি নোহোৱা কৰিবলৈ ৬৫ শতাংশ একত্রিত হ’ব লাগিব৷ আমি চিন্তা কৰিব লাগিব– বড়ো ভাষাক অসমীয়াৰ সহযোগী ভাষা হিচাপে দিয়া বাবে বড়োসকলৰ লগতে অসমীয়াসকলো আনন্দিত হ’ব লাগিব৷ তেনেদৰে বি টি আৰ অঞ্চলৰ ছাইন ব’ডত বড়ো ভাষাৰ লগতে অসমীয়া ভাষাও লিখিব লাগিব৷ বড়োৱে গামোচা পিন্ধিব লাগিব আৰু অসমীয়াই আৰনাই পিন্ধিব লাগিব৷ বড়ো লোকে অসমীয়া আৰু অসমীয়া লোকে বড়ো লিখা এখন সমাজ আমি বিচাৰোঁ৷ যিদিনাখন অসমৰ সকলো জনগোষ্ঠী একগোট হ’ব, সেই দিনাই আজমলৰ ৰাজনীতি শেষ হ’ব৷ আজমলে এই একতা দেখিলে ভয়তে ৰাজনীতি এৰিব৷ আমি কোনো অকলে থাকিব নোৱাৰোঁ৷ অসমৰ ৰাজনীতি তেনেধৰণে নাই৷ আজি অসম মৃত্যুৰ দুৱাৰডলিলৈ আগবাঢ়িছে৷ কোনোৱে আমাক আগ্রাসন কৰিব বিচাৰিছে৷ সেয়েহে অসম মাতৃক জীয়াই ৰাখিবলৈ সকলো জাতি–জনগোষ্ঠী একত্রিত হ’ব লাগিব৷ আজি এনে এটা পৰিৱেশ আহিছে যে গোৱালপাৰাত কোচ ৰাজবংশী লোকসকলে সকলো ধৰণৰ ৰাজনৈতিক অধিকাৰ হেৰুৱাই পেলাইছে৷ এনেকুৱা এটা সময় আহিছে যে ক’ব নোৱাৰাকৈ বড়ো নেতৃত্বয়ো ভোটৰ কাৰণে আজমলৰ লগত মিতিৰালি কৰিছে৷ আজি এনে এটা পৰিৱেশ সৃষ্টি হৈছে যে দৰং জিলাৰ ওদালগুৰিৰ দৰে আন বহু সমষ্টি আমি লাহে লাহে হেৰুৱাব লগা হৈছে৷ দলগাঁও, মৰিগাঁৱৰ লগতে মধ্য অসমৰ পৰা বড়ো তথা জনজাতীয় লোকসকল নিশ্চিহ্ণ হোৱাৰ লগে লগে অসমীয়াসকল সংকটৰ সন্মুখীন হৈছে৷ সেয়েহে একত্রিত হোৱাৰ বাহিৰে আমাৰ অন্য বিকল্প নাই৷